კომპანია AstraZeneca-ს ანტისხეულების ახალმა პრეპარატმა ცდების დროს კორონავირუსის სიმპტომების განვითარების რისკი 77%-ით შეამცირა.
კომპანიაში განაცხადეს, რომ კვლევის მონაწილეთა 75%-ს ქრონიკული დაავადებები ჰქონდა, მათ შორის ზოგიერთს ვაქცინაციებზე დაბალი იმუნური ფრეაქცია გამოუმუშავდა.
კვლევებში მონაწილეთა 2/3-მა კომპანიის ახალი პრეპარატი მიიღო, ხოლო დანარჩენებმა კი პლაცებო. იმ ჯგუფიდან, ვინც ახალი პრეპარატი მიიღო, ვირუსის სიმპტომები არავის გაურთულდა და არც სიკვდილიანობის შემთხვევა არ დაფიქსირებულა. რაც შეეხება იმ ჯგუფს, ვინც პლაცებო მიიღო, აღნიშნულ ჯგუფში 3 მძიმე შემთხვევა და 2 გარდაცვალება დაფიქსირდა.
აღსანიშნავია, რომ დღეს კორონავირუსის პრევენციისა და მკურნალობის მიზნით, დიდი ბრიტანეთის ჯანდაცვის მარეგულირებელმა Regeneron-ისა და Roche-ს მიერ შემუშავებული ანტისხეულების კოქტეილი (Ronapreve) დაამტკიცა.
Ronapreve-ი იმ წამლების კლასს მიეკუთვნება, რომელსაც მონოკლონურ ანტისხეულებს უწოდებენ. ისინი სხეულის მიერ წარმოებული ბუნებრივი ანტისხეულების იმიტაციას ახდენენ. პრეპარატის გამოყენება ვაქცინაციის ჩანაცვლებას არ გულისხმობს.