როდესაც ამერიკაში 11 სექტემბერი მოხდა, დიდი მნიშვნელობა ჰქონდა შეტევას ალქაიდას წინააღმდეგ. 11 სექტემბრის ტერაქტმა განსაკუთრებული სული შთაბერა პოლიტიკური ისლამის მხარდამჭერებს და მათი გაერთიანება, ორგანიზება მოხდა, რომელმაც შემდეგ თავი სირიის მოვლენებში იჩინა, იმ ვითარების დატოვება მაშინ უპასუხოდ არ შეიძლებოდა. რამდენად სწორად მოიქცნენ დასავლური სამხედრო ხელმძღვანელობები ავღანეთთან მიმართებაში, ეს უკვე სხვა საკითხია. ვთვლი რომ ძალიან სერიოზული შეცდომები იყო დაშვებული, თუმცა მაშინდელ ნაბიჯს სრულიად არ ვამტყუნებ, – ამის შესახებ ანალიტიკოსმა, მამუკა არეშიძემ „ქრონიკის“ ეთერში განაცხადა.
„პოლიტიკური ისლამის მთავრი ნიუანსი მდგომარეობს იმაში, რომ რელიგია გამოიყენება პოლიტიკური მიზნების მისაღწევად. ეს ნარატივი ძალიან კარგად არის შესწავლილი, დამუშავებული და კარგად იყენებს უამრავი ძალა ახლო აღმოსავლეთში. შედეგიც გვაქვს 40 წლიანი გაუთავებელი ომები, რომელიც არ დამთავრდება სანამ არ მოხდება ის, რაც მთავარი ამოცანაა პოლიტიკური ისლამის მიმდევრებისთვის, ეს არის ისლამური მსოფლიოს შექმნა“, – განაცხადა მამუკა არეშიძემ.
მან ასევე ისაუბრა ევროპარლამენტის ლიდერთა განცხადებაზე, რომლის თანახმადაც რუსეთი და ჩინეთი რეგიონში შექმნილი პოლიტიკური ვაკუუმის შევსებას ეცდებიან.
„ამას ყველა შეეცდება, ირანიც თურქეთიც, პაკისტანის, რომელსაც საკუთარი ნიშა აქვს დაკავებული ავღანეთში. ავღანეთი გემრიელი ლუკმაა, როგორც რესურსული თვალსაზრისით, ასევე გეოპოლიტიკური მდებარეობით. არავინ შეეშვება ავღანეთს და თუ ვინმეს ჰქონია, რომ დასავლეთი ასე უაპელაციოდ წამოვა ავღანეთიდან ისე, რომ თავისი კვერცხი არ დადოს, ძალიან ცდება. მე ვთვლი, რომ ავღანეთის მძიმე დღეები ჯერ კიდევ წინ გვაქვს. მიუხედავად იმისა, რომ თალიბანმა ფორმალურად გაიმარჯვა, უახლოეს მომავალში გამოიკვეთება სურათი, ვინ დგას თალიბანის უკან და საით წარიმართება თალიბანის იდეოლოგიის მახვილი“, – განაცხადა მამუკა არეშიძემ.