“ნაცმოძრაობის” მხარდამჭერმაც იცის, რომ სააკაშვილი აქ არ ჩამოვა, ოღონდ საკუთარ თავს არ უტყდება, რომ მშიშარა ლიდერი ჰყავს, – ამის შესახებ “გირჩის” ლიდერმა იაგო ხვიჩიამ “ტვ პირველის” ეთერში განაცხადა.
მისი თქმით, ეს ბიძინას თამაშია, რათა წინასაარჩევნოდ ხალხი იყოს დაძაბული.
“სააკაშვილი არ ჩამოვა, ეს ხომ ყველას გვესმის. სააკაშვილი ზედმეტად მშიშარაა იმისთვის, რომ აქ ჩამოვიდეს. ეს ყველას ესმის – “ნაციონალური მოძრაობის” მხარდამჭერებს, ეს ესმით “ქოცებს”. ეს ესმის ბიძინას. არავის არ ეშინია სააკაშვილის ჩამოსვლის. იმიტომ, რომ ზუსტად იციან, რომ მშიშარაა და ვერ ჩამოვა.
ეს “ნაცმოძრაობის” მხარდამჭერმაც იცის, ოღონდ საკუთარ თავს არ უტყდება, რომ მშიშარა ლიდერი ჰყავს. ამ რაღაცა ილუზიაში ვცხოვრობთ, თითქოს ჰერკულესი ჩამოვა და დაამხობს აქაურობას. არ ხდება ეს და არც მოხდება, ეს უბრალოდ ბიძინას და “ოცნების” თამაშია, რომ წინასაარჩევნოდ ხალხი იყოს დაძაბული”, – თქვა იაგო ხვიჩიამ.