არავაქცინირებულ ადამიანებს კოვიდჰოსპიტალიზაციის შანსი 29-ჯერ უფრო მეტი აქვთ, ვიდრე სრულად ვაქცინირებულ ადამიანებს. აღნიშნულს აშშ-ის დაავადებათა კონტროლისა და პრევენციის ცენტრის (CDC) კვლევა ცხადყოფს.
ახალმა კვლევამ ასევე დაადგინა, რომ არავაქცინირებულ ადამიანებს კორონავირუსით ინფიცირების შანსი თითქმის ხუთჯერ უფრო მეტი აქვთ, ვიდრე ვაქცინირებულ ადამიანებს.
„ინფიცირებისა და ჰოსპიტალიზაციის მაჩვენებლის მონაცემები იმაზე მიუთითებს, რომ ავტორიზებული ვაქცინები SARS-CoV-2-ის ინფექციისა და მძიმე დაავადებისგან დაცვას უზრუნველყოფდნენ იმ პერიოდში, როდესაც „დელტა“ ვარიანტის გადაცემა იზრდებოდა“, – ნათქვამია უწყების განცხადებაში.
CDC-ის დირექტორმა, როშელ ვალენსკიმ განაცხადა, რომ მონაცემები ცხადყოფს, რომ „თუ ჯერ აცრილი არ ხართ, თქვენ იმ პირებს შორის ხართ, ვინც ყველაზე მაღალი რისკის ქვეშ არის“.
23 აგვისტოს აშშ-ის სურსათისა და მედიკამენტების ადმინისტრაციამ Pfizer-ის კორონავირუსის საწინააღმდეგო ვაქცინას სრული ავტორიზაცია მიანიჭა. Pfizer-ის ვაქცინა აშშ-ში პირველი ვაქცინაა, რომელმაც მარეგულირებლისგან მსგავსი სტატუსი მიიღო.