დასეტყვილი ყურძნის ჩასაბარებლად სამი საწარმო არის გახსნილი, თუმცა საჭიროების შემთხვევაში მეტი ლოკაცია გაიხსნება. ამის შესახებ გარემოს დაცვისა და სოფლის მეურნეობის მინისტრის მოადგილემ „ქრონიკაში“ განაცხადა. ოთარ შამუგიას თქმით, ყურძნის შეუფერხებლად დაბინავება უზრუნველყოფილია.
„ამისთვის ყველა რესურსი არის შტაბში მობილიზებული. მინდა ვთქვა, რომ ყველა ჩვენი თანამშრომელი არის მობილიზებული იმისთვის, რომ უზრუნველყოს ჩვენი მევენახეების მიერ მოწეული ყურძნის დაბინავება. გარდა ამისა, უნდა აღინიშნოს, რომ აქტიურად ვმუშაობთ სადაზღვევო კომპანიებთან იმისთვის, რომ დასეტყვილი ვენახების შეფასება და ანაზღაურება დროულად მოხდეს“, – განაცხადა შამუგიამ.
მისივე თქმით, პროცესს რთველის საკოორდინაციო საბჭო უწევს მონიტორინგს.
26 აგვისტოს, ძლიერმა სეტყვამ და ქარმა, კახეთის რეგიონში, ყვარლის, თელავის და გურჯაანის მუნიციპალიტეტებში 4 600 ჰექტარი ვენახი დააზიანა. სახელმწიფო საწარმომ შპს „მოსავლის მართვის კომპანიამ” სეტყვისგან დაზიანებული ყურძნის ჩაბარება 27 აგვისტოდან დაიწყო და 3 სექტემბრის ჩათვლით გააგრძელებს.