ჩვენი ოპონენტები გამაკრიტიკებენ, რა თქმა უნდა, მაგრამ ჩვენ არც ამის გვეშინია, არც მათი კრიტიკის და არც მათი მედიების წარმომადგენლების დემაგოგიის; რა თქმა უნდა, ერთადერთი პერიოდი, გამონაკლისი პერიოდი, მშვიდობიანი პერიოდი, გრძელვადიანი სტაბილურობის პერიოდი არის „ქართული ოცნების“ და ბიძინა ივანიშვილის მმართველობის პერიოდი, მეგობრებო, – ამის შესახებ საქართველოს პრემიერ-მინისტრმა ირაკლი ღარიბაშვილმა „ქართული ოცნების“ საჩხერის მერობის კანდიდატის, ლევან ივანაშვილის წარდგენისას განაცხადა.
მთავრობის მეთაურის შეფასებით, სწორედ ბიძინა ივანიშვილის და მისი პოლიტიკური გუნდის დამსახურებაა, რომ ქვეყანაში არის გრძელვადიანი მშვიდობა და სტაბილურობა.
„ვთქვათ პირდაპირ, მოდით, ზედმეტი შელამაზების გარეშე და მე არ მიყვარს შელამაზება, პირდაპირ უნდა ითქვას ყველაფერი, სათქმელი უნდა ვთქვათ პირდაპირ და გულწრფელად – დიახაც სწორედ ბიძინა ივანიშვილის დამსახურებაა, რომ ქვეყანაში არც ომი მომხდარა, არც რაიმე კონფლიქტი, არც რაიმე დაპირისპირება, სწორედაც მისი დამსახურებაა, მისი მმართველობის და მისი პოლიტიკური გუნდის, რომელიც დღეს მართავს ქვეყანას, რომ ჩვენს ქვეყანაში არის გრძელვადიანი მშვიდობა და სტაბილურობა, განვითარება ყველა რეგიონში, ყველა ქალაქში, ყველა მუნიციპალიტეტში, რა თქმა უნდა, ეს შემთხვევით არ ხდება, ასე მარტივი არ ყოფილა ეს ხომ?! გადახედეთ სხვა მმართველების პერიოდსა და მათ მძიმე მემკვიდრეობას. კარგად გვახსოვს მიწაზე გართხმული სააკაშვილი ომის დროს, როგორ ლაჩრულად მოიქცა, როგორ მიატოვა ჩვენი საამაყო ჯარი, კარგად გვახსოვს ის მძიმე დანაშაულები. ღალატია, რა თქმა უნდა, როცა შენ, ოკუპანტს ჩააბარებ კოდორის ხეობას, ასზე მეტ სოფელსა და შემდეგ სააკაშვილის პირით – მან თქვა პირადად ტელევიზიის საშუალებით თქვა, რომ ეს სოფლები იყო ქვების გროვაო. ღალატია, აბა რა ჰქვია ამას, ამიხსენით, ხალხო! რა ჰქვია ამას, თუ არა ღალატი და შენი ქვეყნის მოტყუება, დაღალატება და შენი ხალხის მიტოვება. ეს ყველაფერი, მეგობრებო, არც თუ ისე შორეულ წარსულში იყო. რა თქმა უნდა, ჩვენს გასაგონად არ ვამბობთ ამას, ტელევიზია გვესწრება აქ, მედია გვესწრება და ჩვენს მოსახლეობას უნდა შევახსენოთ, თუ სად ვიყავით, სად ვართ და საით მივდივართ, სად გვინდა, რომ წავიყვანოთ ჩვენი ქვეყანა”, – განაცხადა პრემიერმა.
ირაკლი ღარიბაშვილის თქმით, ქვეყანა სწორი მიმართულებით მიდის, ვითარდება და კიდევ უფრო მეტი გაკეთდება.
„ახლა ჩვენ შევიმუშავეთ გრძელვადიანი განვითარების ხედვები, რომ კიდევ უფრო დავაჩქაროთ ის ტემპები და ის მასშტაბები გავზარდოთ, რომელიც აუცილებელია. ყველა სექტორის მიმართულებით, ყველა სამინისტრომ მოამზადა გრძელვადიანი განვითარების ხედვა კონკრეტული თავისი სამოქმედო გეგმით, გაწერილი ვადებში და ვიცით რა როდის, როგორ გავაკეთოთ, რამდენ ხანში, რა დაფინანსება სჭირდება ამ ყველაფერს და საიდან მოგვაქვს ეს დაფინანსება. გვაქვს ორნიშნა ეკონომიკური ზრდა და მართლაც უპრეცედენტოა ამ ვითარებაში, პოსტკოვიდურ სიტუაციაში მთელ მსოფლიოში. ამით ვამაყობ. დიახაც საამაყოა, იმიტომ, რომ გვაქვს ორნიშნა, 12%-იანი ეკონომიკური ზრდა, რითაც სულ რაღაც 5-6 თვეში ჩვენი ბიუჯეტი 1,200 მილიარდით გაიზარდა და 7 თვის ეკონომიკურმა ზრდამ 12,2% შეადგინა. ამას სჭირდება შენარჩუნება და კიდევ უფრო მეტი ტემპებით, მეტი ენერგიით, მეტი მოტივაციით განვითარება წინსვლა”, – განაცხადა პრემიერმა.