იტალიის პრემიერ-მინისტრმა, მარიო დრაგიმ დაუშვა, რომ კორონავირუსის საწინააღმდეგო ვაქცინაცია სავალდებულო შეიძლება გახდეს.
მარიო დრაგის თქმით, როგორც კი ევროპის წამლის სააგენტო (EMA) ვაქცინებს სრულად დაამტკიცებს, ვაქცინაცია იტალიელებისთვის სავალდებულო შეიძლება გახდეს.
„ვალდებულება ამოქმედდება მაშინ, როდესაც ვაქცინა ევროპის წამლის სააგენტოსა და ეროვნული მარეგულირებლის მიერ გამოცხადებული იქნება არა როგორც გადაუდებელი გამოყენებისთვის განკუთვნილი, არამედ როგორც ჩვეულებრივი პრეპარატი“, – აღნიშნა იტალიის პრემიერ-მინისტრმა.
23 ივლისს იტალიის მთავრობამ არავაქცინირებული მოქალაქეებისთვის შეზღუდვები დაამტკიცა.
5 აგვისტოდან სტადიონებზე, მუზეუმებში, თეატრებში, კინოთეატრებში, საგამოფენო ცენტრებსა და სპორტდარბაზებში შესვლა მხოლოდ ე.წ. „მწვანე საშვის“ წარდგენის შემთხვევაშია შესაძლებელი.
აღნიშნული დოკუმენტი ასევე საჭიროა დახურული ტიპის რესტორნებში მომსახურების მისაღებად.