ევროკავშირის საგარეო საქმეთა მინისტრებმა განაცხადეს, რომ ევროკავშირი დაუკავშირდება ავღანეთის რადიკალურ “თალიბანის” მთავრობას და არ აღიარებს მას პოლიტიკურად, რათა უზრუნველყოს ადგილობრივი მოსახლეობის მხარდაჭერა. ამის შესახებ ევროკავშირის წარმომადგენელმა ჯოზეფ ბორელმა განაცხადა.
“მინისტრებმა ხაზგასმით აღნიშნეს, რომ ევროკავშირი კვლავაც მხარს უჭერს ავღანეთის მოსახლეობას. ავღანელი მოსახლეობის მხარდასაჭერად, ჩვენ უნდა ვითანამშრომლოთ ავღანეთის ახალ მთავრობასთან, რაც არ ნიშნავს მის პოლიტიკურ აღიარებას. ეს მხოლოდ ოპერატიული დიალოგია”, – თქვა მან.
მისი თქმით, ასეთი დიალოგის სიღრმე პირდაპირ იქნება დამოკიდებული ავღანეთის ახალი ხელისუფლების ქმედებებზე. “ჩვენ განვიხილეთ ავღანეთის ხელისუფლებასთან დიალოგის ინტენსივობის განსაზღვრის კრიტერიუმები თალიბანის ხელისუფლებაში მოსვლის შემდეგ. ამ დიალოგის სიღრმე დამოკიდებული იქნება რეჟიმის ქცევაზე,” – თქვა ბორელმა.
ბორელმა დაასახელა ხუთი ასეთი კრიტერიუმი: ახალი ხელისუფლების ბრძოლა ტერორიზმის წინააღმდეგ, ადამიანის უფლებების დაცვა, განსაკუთრებით ქალებისათვის, გარდამავალი მთავრობის შექმნა, ჰუმანიტარული წვდომის უზრუნველყოფა და გარანტიები ყველასთვის გამგზავრების შესაძლებლობის შესახებ.
ქაბულთან დიალოგის ჩასატარებლად და ამ კრიტერიუმების შესრულების მონიტორინგის მიზნით, მინისტრები შეთანხმდნენ, რომ ევროკავშირს შეუძლია დააბრუნოს თავისი დიპლომატიური მისია ქაბულში, თუ ამისთვის შეიქმნება უსაფრთხოების პირობები. “ჩვენ კოორდინაციას ვუწევთ თალიბანთან კონტაქტებს, მათ შორის ევროკავშირის საერთო ყოფნას ქაბულში, შექმნილი ევროკავშირის საგარეო პოლიტიკის სამსახურის მიერ, თუ ამისთვის შეიქმნება უსაფრთხოების პირობები”, – თქვა ბორელმა.