არ მესმის, უფრო ძლიერი ევროპა ნატოსთვის შეშფოთების საგანი რატომ შეიძლება იყოს, – განაცხადა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჟოზეფ ბორელმა PBS-სთვის მიცემულ ინტერვიუში.
„არ მესმის, უფრო ძლიერი ევროპა ნატოსთვის შეშფოთების საგანი რატომ შეიძლება იყოს. რაც უფრო ძლიერი იქნება ევროპა, მით უფრო ძლიერი იქნება ნატო, რადგან ჩვენ ნატოს ნაწილი ვართ. საუბარი ჩანაცვლებაზე არ არის. ევროპელების სამხედრო შესაძლებლობები ნატოს ავსებს. ეს ალტერნატივა არ არის. ჩვენ უნდა შეგვეძლოს დამოუკიდებლად მოქმედება იმ სიტუაციებსა და შემთხვევებში, სადაც აშშ-ის ან ნატოს ჩარევის მოლოდინი არ გვაქვს. საჭიროების შემთხვევაში, მარტო მოქმედება უნდა შევძლოთ“, – აღნიშნა ჟოზეფ ბორელმა.
2 სექტემბერს ჟოზეფ ბორელმა განაცხადა, რომ ევროკავშირმა სწრაფი რეაგირების ძალა უნდა შექმნას.
„ზოგჯერ არის მოვლენები, რომლებიც ისტორიის კატალიზაციას ახდენს, გარღვევას ქმნის და ვფიქრობ, რომ ავღანეთი ერთ-ერთი ასეთი შემთხვევაა. სწრაფი რეაგირების ძალა ამის ნაწილი უნდა იყოს“, – აღნიშნა ჟოზეფ ბორელმა.
მისი თქმით, ევროკავშირმა ქვედანაყოფები უნდა შექმნას, რომელიც უფრო ოპერატიული იქნება, ვიდრე საბრძოლო ჯგუფები.
„უფრო ძლიერი ევროპული თავდაცვის საჭიროება გაცილებით აშკარაა, ვიდრე ოდესმე ყოფილა“, – განაცხადა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა.