საფეხბურთო კლუბ “ზუგდიდსა” და ბოლნისის “სიონს” შორის გასამართი შეხვედრის ჩატარების ადგილმა დიდი ვნებათაღელვა გამოიწვია. საბოლოოდ კი გადაწყდა, რომ უმაღლესი ლიგის წითელი ჯგუფის ბინადრები მეთერთმეტე ტურის პრინციპულ დუელს სამტრედიაში, ეროსი მანჯგალაძის სახელობის სტადიონზე, კვირას, 6 ნოემბერს ჩაატარებენ.
აღნიშნულმა ფაქტმა “ზუგდიდის” სპორტული დირექტორის, ზურაბ პერტაიას უკმაყოფილება გამოიწვია. მან სფფ-ს ხელმძღვანელთა მხრიდან “სიონისადმი” დახმარებაზეც კი დაიწყო ღია საუბარი. თავის მხრივ, ბოლნისელთა გენერალურმა დირექტორმა, ლადო ბურდულმა, “ზუგდიდის” წარმომადგენლის ეჭვებს ვრცლად და დეტალურად უპასუხა. საქართველოს ნაკრების ყოფილ ფეხბურთელთან ინტერვიუ სპორტულმა გამოცემამ “სპორტალმა” გამოაქვეყნა.
ზუგდიდის კლუბის გარკვეული თანამშრომლები არ ეგუებოდნენ, სფფ-ის მიერ შეთავაზებულ “სამტრედიის” ვარიანტს და ითხოვდნენ, რომ მატჩი ზედა ეწერის მოედანზე გამართულიყო და იმუქრებოდნენ, თუ ეს ასე არ გადაწყდება, თამაშზე არ გამოვცხადდებითო. სამტრედიის “ეროსი მანჯგალაძე” კი ყველაზე ახლო სტადიონი იყო ზუგდიდელთათვის, სადაც მათ თამაშის გამართვა შეეძლოთ.
თუმცა ზუგდიდური კლუბის მხრიდან წამოსულ ამ ბრალდებებსა თუ ეჭვებს ამავე კლუბის ვიცე პრეზიდენტი და ამავდროულად, მთავარი მწვრთნელის მოვალეობის შემსრულებელი ლევან გულორდავა ემიჯნება. ის აცხადებს, რომ გაგებით ეკიდება ფედერაციის სამართლიან პოზიციას. ობიექტურად კი უნდა გავიხსენოთ ის ფაქტიც, რომ “ზუგდიდის” მოთამაშეები, კლუბის მხრიდან დიდი სახელფასო დავალიანების გამო, ბათუმის “დინამოსთან” შეხვედრის წინ რამდენიმე დღე არ ვარჯიშობდნენ, საერთოდ მოედანზე გასვლას არ აპირებდნენ და ამ მატჩის ჩაშლით იმუქრებოდნენ. ისიც, რომ კლუბში ინვესტორთან დაკავშირებული სერიოზული პრობლემა გამოაშკარავდა, რაც ცხადყოფს, რომ “ზუგდიდის” პრობლემა მოედნის ფარგლებს ბევრად სცილდება და კლუბის ხელმძღვანელებს დავალიანებების დაფარვისა და ფეხბურთელებისთვის კუთვნილი ხელფასების გაცემის პრობლემის მოცემულ ვითარებაში, “მოედნის თემით” გადაფარვა ან წინასწარ განწირული შედეგის სხვაზე გადასაბრალებელი ფონის შექმნა სურდათ.
“ზუგდიდი”, რომელიც უმაღლესი ლიგის “წითელი ჯგუფში” 10 ტურის შემდეგ 6 ქულით ბოლო პოზიციაზეა, ორი ქულით ჩამორჩება მეექვსეზე განლაგებულ ბოლნისის “სიონს” და თუ დარჩენილ 3 ტურში ვერ დააღწია თავი ცხრილის ფსკერს, მომავალ სეზონზე რანგით დაბალ ლიგაში, გადათამაშების გარეშე ამოჰყოფს თავს.
ბოლოს კი კიდევ ერთი გარემოება, რომელმაც “ზუგდიდს” მიმდინარე პირველობაზე უმაღლეს ლიგაში დარჩენის საშუალება მისცა: გასული ჩემპიონატის ბოლოს გასავარდნ ზონაში მყოფი ზუგდიდელები გადათამაშებაში ხობის “კოლხეთს” შეხვდნენ და იმის გამო, რომ ხობის გუნდმა სფფ-ის მხრიდან ლიცენზია ვერ მიიღო, მათი გამარჯვების შემთხვევაშიც კი, უმაღლესში ვერმოხვედრის საკითხი გადათამაშებამდეც ცნობილი იყო. ასეთ ვითარებაში, “ზუგდიდმა” უმოტივაციო “კოლხეთს” აჯობა და ჯერ კიდევ გასულ პირველობაზე დაქვეითებას ამრიგად გადაურჩა. ორი წლის წინ გავარდნილი “ზუგდიდი” მხოლოდ ფედერაციის გადაწყვეტილებით დარჩა უმაღლეს ლიგაში, როცა ყოფილმა სფფ-ის პრეზიდენტმა რეგლამენტი შეცვალა და თორმეტგუნდიანი ჩემპიონატი თექვსმეტიანად გადააკეთა.
