იაპონიის პარლამენტმა ქვეყნის ახალ პრემიერ-მინისტრად ფუმიო კიშიდა აირჩია. საკანონმდებლო ორგანოს ქვედა პალატაში ჩატარებული კენჭისყრის თანახმად, კიშიდა კანდიდატურას მხარი 458 დეპუტატიდან 311-მა დაუჭირა. ინფორმაციას ადგილობრივი მედია ავრცელებს.
იაპონიის პრემიერ-მინისტრის არჩევისას პარლამენტში ზედა პალატასთან შედარებით უპირატესობა ქვედა პალატას ენიჭება და სწორედ მისი კენჭისყრის შედეგი განსაზღვრავს მთავრობის ახალ ხელმძღვანელს. ამ წუთებში კიშიდას კანდიდატურაზე ხმის მიცემის პროცედურა იაპონიის პარლამენტის ზედა პალატაში მიმდინარეობს.
იაპონიის პარლამენტის ორივე პალატას ლიბერალ-დემოკრატიული პარტია აკონტროლებს. იაპონური მედიის ინფორმაციით, ქვეყნის ახალი პრემიერ-მინისტრი პარლამენტის ქვედა პალატის დათხოვნას 14 ოქტომბერს გეგმავს და იაპონიაში 31 ოქტომბერს საპარლამენტო არჩევნები გაიმართება. ფუმიო კიშიდა 2012-2017 წლებში იაპონიის საგარეო საქმეთა მინისტრის თანამდებობას იკავებდა.