მეორე ტურში ჩვენი კანდიდატები ასევე ძალიან დამაჯერებლად გაიმარჯვებენ, – ამის შესახებ საპარლამენტო უმრავლესობის წევრმა, აგრარულ საკითხთა კომიტეტის თავმჯდომარემ, ნინო წილოსანი განაცხადა.
მისი თქმით, უმრავლესობა მაქსიმუმს გააკეთებს ამომრჩევლის მობილიზაციისთვის.
„იმ კონტექსტის გათვალისწინებით, რომ „ქართულმა ოცნებამ“ მთელი მოსახლეობის 47%-მდე მხარდაჭერა მოიპოვა და ოლქების 2/3-ში გაიმარჯვა, მეორე ტურში ჩვენი კანდიდატები ასევე ძალიან დამაჯერებლად გაიმარჯვებენ. ჩვენი მხრიდან მაქსიმუმი გაკეთდება ჩვენი ამომრჩევლის მობილიზაციისთვის და ასევე იმ ამომრჩევლის მოსამხრობად, რომელიც რადიკალურად ემიჯნება „ნაციონალური მოძრაობისა“ და მიხეილ სააკაშვილი პოლიტიკას“, – აღნიშნა ნინო წილოსანმა.
ცენტრალური საარჩევნო კომისიის წინასწარი მონაცემებით, ადგილობრივი თვითმმართველობის არჩევნებში საქართველოს მასშტაბით პირველ ადგილზე 46,74 პროცენტით „ქართული ოცნება“ გავიდა, მეორე ადგილი კი, 30,68 პროცენტით „ნაციონალურმა მოძრაობამ“ დაიკავა. არჩევნების მეორე ტური 30 ოქტომბერს გაიმართება.