ევროკომისიამ ევროკავშირის საბჭოს უნგრეთისთვის 4.2 მილიარდი ევროს გაყინული თანხების განბლოკვის წინადადება წარუდგინა.
ევროკომისიის განცხადებით, თანხები უნგრეთში კანონის უზენაესობასთან დაკავშირებული პრობლემების გამო იყო გაყინული.
ევროკომისიის შეფასებით, უნგრეთმა შესაბამისი რეფორმები გაატარა და გამოვლენილი პრობლემების მოსაგვარებლად მნიშვნელოვანი ნაბიჯები გადადგა. კერძოდ, რეფორმები განხორციელდა სახელმწიფო შესყიდვების, ანტიკორუფციული სისტემის, ინტერესთა კონფლიქტის რისკებისა და პროკურატურის საქმიანობის მიმართულებით.
„უნგრეთმა მნიშვნელოვანი ნაბიჯები გადადგა კანონის უზენაესობის გასაძლიერებლად და ევროკავშირის ფინანსური ინტერესების დასაცავად. დღეს ჩვენ ვთავაზობთ 4.2 მილიარდი ევროს განბლოკვას და უნგრელი სტუდენტებისა და მკვლევრებისთვის Erasmus+-ისა და Horizon Europe-ის პროგრამების ხელმისაწვდომობის აღდგენას. მოხარული ვარ, რომ ისინი კვლავ სრულად ისარგებლებენ იმ შესაძლებლობებით, რომლებსაც ჩვენი კავშირი ქმნის. ეს ადასტურებს, რომ რეფორმებს შედეგი მოაქვს“, – განაცხადა ევროკომისიის პრეზიდენტმა, ურსულა ფონ დერ ლაიენმა.
ევროკომისიის წინადადებაზე საბოლოო გადაწყვეტილება ევროკავშირის საბჭომ ერთი თვის ვადაში უნდა მიიღოს.