კენჭისყრამდე ნიკა მელია თუ არ გაიხმობს საკუთარ განცხადებას და არ განაცხადებს, რომ სურს მანდატის შენარჩუნება, პარლამენტი ვალდებულია, შესაბამისი გადაწყვეტილება მიიღოს, – ამის შესახებ საქართველოს პარლამენტის ვიცე-სპიკერმა არჩილ თალაკვაძემ ნიკა მელიასთვის სადეპუტატო უფლებამოსილების შეწყვეტასთან დაკავშირებით განაცხადა.
მისი თქმით, ნიკა მელიასთვის მანდატის შეწყვეტაზე კენჭისყრა დღეს, ნაშუადღევს ჩატარდება.
„პარლამენტმა ერთხელ უკვე მიიღო კონსტრუქციული და სახელმწიფოებრივი გადაწყვეტილება მანდატების შეწყვეტასთან დაკავშირებით და უარი თქვა მანდატების მასობრივ შეწყვეტაზე, რასაც შემდეგ მოჰყვა მოლაპარაკება და ის შედეგი, როცა ოპოზიცია არის პარლამენტში.
რაც შეეხება ნიკანორ მელიას, მან წინასაარჩევნო პერიოდში ხელახლა მიმართა პარლამენტს მანდატის შეწყვეტის მოთხოვნით, შესაბამისად, პარლამენტი ვალდებულია, უახლოეს სხდომაზე განიხილოს მისი განცხადება და ეს სხდომა გახლავთ დღეს. რა თქმა უნდა, კენჭისყრა ამ საკითხზე ჩატარდება დღევანდელ სხდომაზე ნაშუადღევს, მანამდე ნიკანორ მელიას ან მის პოლიტიკურ გუნდს აქვს საშუალება კიდევ ერთხელ გადახედოს თავის გადაწყვეტილებას და გაიხმოს თავის განცხადება უკან, სხვა შემთხვევაში, პარლამენტი ვალდებულია შესაბამისი გადაწყვეტილება მიიღოს. თუ ის კენჭისყრამდე არ გაიხმობს საკუთარ განცხადებას უკან და ამაზე პოლიტიკურ განცხადებას არ გააკეთებს, რომ მას სურს მანდატის შენარჩუნება, პარლამენტს ვალდებულება აქვს და ჩვენ მივიღებთ შესაბამის გადაწყვეტილებას“, – განაცხადა თალაკვაძემ.