ერაყში საარჩევნო უბნები 07:00 საათზე გაიხსნა – მოსახლეობა უმაღლესი საკანონმდებლო ორგანოს არჩევნებში მონაწილეობს, – ამის შესახებ Al Jazeera წერს.
329 პოლიტიკოსს, რომელიც, მოსახლეობის მხარდაჭერით, ერაყის წარმომადგენელთა საბჭოში აღმოჩნდება, საკანონმდებლო ცლილებების გარდა, ქვეყნის პრეზიდენტისა და პრემიერის დამტკიცების უფლება ექნება.
ამ დროისთვის, აქტივობა დაბალია, რასაც პოლიტიკოსების დაპირებების მიმართ მოსახლეობის უნდობლობას უკავშირებენ.
„ხმა მივეცი, რათა მინდა ჩემი ქვეყნის უკეთესობისკენ შეცვლა. მინდა, შეიცვალონ ამჟამინდელი ლიდერები, რომლებიც არაკომპეტენტურები და უმოქმედოები არიან. მათ ბევრი დაპირება მოგვცეს, მაგრამ ჩვენთვის არაფერი გაუკეთებიათ“, – ამბობს 37 წლის ჯიმანდ ხალილი, რომელიც ბაღდადში მდებარე უბნის ერთ-ერთი პირველი ამომრჩეველი იყო.
დედაქალაქში უსაფრთხოების ზომები გამკაცრებულია – ამომრჩევლებს, კაბინასთან მისვლამდე, უბნების შესასვლელებში, ორჯერ ჩხრეკენ.
მიუხედავად იმისა, რომ ხელისუფლებამ ჯერ კიდევ 2017 წელს გამოაცხადა დაჯგუფება „ისლამურ სახელმწიფოზე“ გამარჯვება, უსაფრთხოებისთვის, ქვეყნის ყველა აეროპორტი, ხვალამდე, დაკეტილი იქნება.
„ერაყელებს უნდა გააჩნდეთ ნდობა, რომ ხმას ისე მისცემენ, როგორც თავად სურთ – ზეწოლისგან, დაშინებისა და მუქარისგან თავისუფალ გარემოში“, – აცხადებენ გაეროს ადგილზე მომუშავე მისიაში.
არჩევნებს ევროკავშირისა და გაერთიანებული ერების ორგანიზაციის ათობით დამკვირვებელი აკვირდება. საარჩევნო უბნები 18:00 საათზე დაიხურება, პირველად შედეგებს კი, დასრულებიდან 24 საათში ელოდებიან.
საპარლამენტო მარათონში, 329 ადგილის დასაკავებლად, 170-მდე პარტია და 3 200-ზე მეტი კანდიდატია ჩართული.