“ჩვენი დღევანდელი გზავნილია, რომ მივიდეთ არჩევნებზე და დავაფიქსიროთ ჩვენი არჩევანი”

,,ჩვენი მთავარი გზავნილია, რომ ჩვენ ადგილობრივი არჩევნები უნდა ჩავატაროთ იმისთვის, რომ შემდეგი წლების განმავლობაში ცენტრალურმა და ადგილობრივმა ხელისუფლებამ იმუშაონ მჭიდროდ, ითანამშრომლონ ისეთ რეჟიმში, რომ თითოეული ჩვენი მოქალაქის საჭიროება, პირადი პრობლემები, გადაწყდეს სოფლის, რეგიონის მუნიციპალიტეტის დონეზე. თუ ეს არ იქნება ქვეყანა ვერ შეძლებს წინსვლას, ვერ შეძლებს განვითარებას, სოციალური და დარგობრივი პრობლემების მოგვარებას, საკითხებს, რომელიც უკავშირდება სოფლის მეურნეობას, ეკონომიკის სხვადასხვა მიმართულებას, უბრალოდ სტაბილურობას, უსაფრთხოებას”, – განაცხადა გარემოს დაცვისა და სოფლის მეურნეობის მინისტრმა, რომელიც თავისუფლების მოედანზე მიმდინარე აქციაზე იმოფება.
ლევან დავითაშვილის განცხადებით, ,,ქართული ოცნების” ორგანიზებით გამართული აქციის მთავარი გზავნილია, რომ ამომრჩეველმა არჩევანი გააკეთოს ქვეყნის სტაბილურობის, მომავალზე ზრუნვის, განვითარების სასარგებლოდ და არა დესტრუქციის, დესტაბილიზაციის, სახელმწიფო ინსტიტუტების ჩამოშლისა და წარსულში დავრუნებასა და ქაოსზე.
,,მე ვფიქრობ, რომ გასაკვირი არაა, როცა ქართული ოცნება, რომელსაც ყავს დაახლოებით მილიონი ამომრჩეველი, შეკრებდა ძალიან ბევრ მხარდამჭერს, რომელიც იტყოდა, რომ მათ უნდათ ქვეყნის სტაბილური განვითარება. ოპოზიცია კი პირდაპირი მოწოდებებით თავის ამომრჩევლებს და მოსახლეობას ეუბნება, რომ მათი დღის წესრიგია არა ადგილობრივი არჩევნების ჩატარება, არამედ ქვეყანაში სტაბილური განვითარების შეჩერება, რომელიც თავის თავში დესტრუქციას მოიცავს. ჩვენ აქ ვხედავთ, რომ ძალიან ბევრი ახალგაზრდა ადამიანია, რომელიც ხვალინდელ დღეზე ფიქრობს. 100 000-მდე მხარდამჭერია გამოსული დღეს მოედანზე, რომელიც ამბობს, რომ ქვეყანაში მათ სჭირდებათ სტაბილური განვითარება, ეკონომიკაზე ზრუნვა, ის რაც პრემიერმა წლის განმავლობაში თითოეული დარგის მიხედვით წარუდგინა საზოგადოებას. მათ შორის 10 წლიანი გეგმები, რომელიც უნდა შესრულდეს, რათა თითოეულ ოჯახში შევიდეს მეტი სიკეთე და კეთილდღეობა. მსოფლიოში ძალიან ბევრი გამოწვევაა, ძალიან რთული დროა და ამ პერიოდში რა თქმა უნდა ჩვენ გვჭირდება მეტი მობილიზება და კონსოლიდაცია და არა ქვეყნის არევა“. – განაცხადა ლევან დავითაშვილმა.