გუშინ მთელმა მსოფლიომ გაიგო, რომ ქართველი ხალხი წყვეტს როგორი უნდა იყოს ჩვენი ქვეყნის მომავალი და განვითარება, – ამის შესახებ პრემიერ-მინისტრმა, ირაკლი ღარიბაშვილმა გადაცემაში „იმედი LIVE“ განაცხადა.
მთავრობის მეთაურმა „ქართული ოცნების“ ამომრჩეველს მადლობა გადაუხადა შემაჯამებელ აქციაში მონაწილეობის მიღებისთვის და აღნიშნა, რომ გუშინ მისთვისაც ძალიან ემოციური დღე იყო, რადგან პირველად წარდგა ამდენი გულანთებული პატრიოტის წინაშე.
„გუშინ მართლაც ძალიან ემოციური დღე იყო. ბუნებრივია, ჩემთვისაც ძალიან ემოციური იყო, პირველად წარვდექი ამდენი გულანთებული ქართველი პატრიოტის წინაშე და მე მინდა თქვენი ეთერის საშუალებით კიდევ ერთხელ გულწრფელი მადლობა გადავუხადო ჩვენს ამომრჩეველს, მართლაც ძალიან გენიალურ ხალხს, ჩვენს უნიკალურ ხალხს. ბუნებრივია, ეს იყო ძალიან ემოციური დღე, ჩვენ ყველამ ერთად ვიხილეთ, რომ ჩვენი ქვეყნის ბედს ქართველი ხალხი წყვეტს. გუშინ მთელმა მსოფლიომ გაიგო, ნახა კიდევ ერთხელ, რომ ქართველი ხალხი წყვეტს, როგორი უნდა იყოს ჩვენი ქვეყნის მომავალი, განვითარება და ქართველი ხალხი არის ჩვენი ქვეყნის მმართველი. ასე რომ, კიდევ ერთხელ მინდა მადლობა გადავუხადო ჩვენს ხალხს“,- განაცხადა ირაკლი ღარიბაშვილმა.