რატომ ჩამოვიდა სააკაშვილი? ერთის მხრივ, ვუსმენთ მათ აბსურდულ ვერსიებსა და ბოდვას, რომ თითქოს ვაჟკაცობისა და თავდადების მაგალითი აჩვენა თავის ამომრჩეველს, სრული აბსურდია. თუ კაცს გინდა აჩვენო ვაჟკაცობა და თავდადების მაგალითი, აიღე ბილეთი და ჩამოხვალ ჩვეულებრივად, ნორმალურად, როგორც ეკადრება პრეზიდენტს, – ამის შესახებ პრემიერ-მინისტრმა, ირაკლი ღარიბაშვილმა გადაცემაში „იმედი LIVE“ განაცხადა.
„მაგრამ ახლა ვთქვათ ვინ იყო პრეზიდენტი. კაცი, რომელიც 9 წელი იყო პრეზიდენტი, საკუთარი ნებით, სურვილით დატოვა ჩვენი ქვეყნის მოქალაქეობა და პასპორტი ჩააბარა. გახდა უკრაინის მოქალაქე და დღესაც ისტერიულად იმეორებს, რომ უკრაინის მოქალაქეა. ამაზე მეტი სირცხვილი რა შეიძლება იყოს?“, – განაცხადა პრემიერმა.
მისივე თქმით, მიხეილ სააკაშილს ერთადერთი განზრახვა ის ჰქონდა, რომ ის 2 ოქტომბერს დაანონსებულ აქციაზე გამოჩნდებოდა.
„ის იტყოდა, აი, ჩამოვედი ისე, რომ ვერ გაიგო მთავრობამ. ამ დროს, რა თქმა უნდა, მთავრობამ ყველაფერი იცოდა, ჩვენ ინფორმაცია გვქონდა თავიდან ბოლომდე, ვიცოდით, სად იმალებოდა. აქვე მინდა, მოსახლეობას ვუთხრა, რომ გასაღებით გავაღეთ ბინის კარი, რომელშიც იგი იმალებოდა. ამით ჩანს ყველაფერი, რომ სრული კონტროლის ქვეშ იყო სიტუაცია და ბუნებრივია, სიმბოლურად დაემთხვა ეს ყველაფერი 1-ელ ოქტომბერს. ახლა, რა უნდა მომხდარიყო ამ აქციაზე. მოგეხსენებათ, ვინაიდან იგი არის ბრალდებული და სასამართლო გადაწყვეტილება ძალაშია შესული, სამივე ინსტანციის, ბუნებრივია, პოლიციას მოუწევდა მისი დაუყოვნებლივ დაკავება. ეს რა თქმა უნდა, გამოიწვევდა პირდაპირ დაპირისპირებას, პოლიციას მოუწევდა სპეცრაზმის, მათ შორის სპეციალური საშუალებების გამოყენება, ალბათ წყლის ჭავლის, გაზის და შიგნიდან რა ინფორმაციაც გვაქვს, აქ გათვლა იყო, რომ რამდენიმე ადამიანის, მათ შორის ოპოზიციური ლიდერის, არ მინდა გვარები ვთქვა, ზედმეტი სპეკულაცია რომ არ გამოგვივიდეს, მკვლელობა პირდაპირ, მისი პარტიის წევრების, 2-3 ადამიანის. წარმოიდგინეთ, არჩევნების შედეგები გამოცხადებული არ არის, მსოფლიო შოკში ჩავარდებოდა, რომ ეს მოხდა, დარბევა და ეს ყველაფერი, სრული დელეგიტიმაცია მოხდებოდა ჩვენი მთავრობის და დიდი კითხვის ნიშნის ქვეშ დადგებოდა არჩევნების ლეგიტიმურობაც, ჩატარებაც და ბუნებრივია, შედეგებიც. შემდეგ იყო გეგმა, რომ აიღებდნენ ცესკოს შენობას, პარლამენტის შენობას, კანცელარიის შენობას და სრულ ქაოსში გაეხვეოდა ჩვენი ქვეყანა. გათვლა იყო, რომ ეს გამოიწვევდა ინსტიტუტების დემორალიზებას და ასეთი სცენარით ჩამოვიდა, რა შეიძლება ამ ადამიანს უწოდო, თუ არა მტერი. ეს ავარიდეთ ჩვენს ქვეყანას. არ მინდა, გამოძიების დეტალებში შევიდე, ჩემი პრეროგატივა არ არის, მაგრამ ყველა სცენარი და ყველა ვერსია ლეგიტიმურია“, – აღნიშნა პრემიერმა.