„ნაციონალურ მოძრაობას“ პოლიტიკური დაავადება აქვს, თავისი წევრების ჯანმრთელობა და სიცოცხლეც კი არ აინტერესებთ, – ამის შესახებ საპარლამენტო უმრავლესობის წევრმა, გურამ მაჭარაშვილმა განაცხადა. მისი თქმით, რა გეგმები ჰქონდა სააკაშვილს, ამის დადგენაში, შესაძლოა, მისივე ვიდეოები დაეხმაროთ.
„ვიცით, რომ მიმდინარეობს მოკვლევა და გამოძიება იმასთან დაკავშირებით, როგორ შემოვიდა მიხეილ სააკაშვილი ქვეყანაში უკანონოდ, ბევრი დეტალი შეიძლება გახდეს ცნობილი. სწორედ ამას გულისხმობს ირაკლი ღარიბაშვილი, როცა ამბობს, რომ თავის დროზე გახდება ცნობილი, ყველა ის დეტალი, თუ რა ჰქონდა გეგმაში მიხეილ სააკაშვილს როცა შემოვიდა ქვეყანაში.
შეიძლება მის მიერ ჩაწერილი ვიდეოები დაგვეხმაროს, თუ რა გეგმები ჰქონდა, როცა საქართველოში შემოდიოდა ისევე, როგორც აქამდე გვეხმარება ეს ვიდეოები. რევოლუციურ სცენარებზე გამოძიება კი არ საუბრობს, სააკაშვილი საუბრობდა და საუბრობს დღემდე. ამას რად უნდა პრემიერის ან ჩემი დამტკიცება, თავად ამბობს, რომ უნდა ჩამოვშალოთ და დავამხოთ ხელისუფლებაო, მისი მომხრეები კი ამბობენ, უნდა ავჯანყდეთო“, – განაცხადა გურამ მაჭარაშვილმა.
საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს.პატიმრობაში მყოფმა სააკაშვილმა შიმშილობა გამოაცხადა, მხარდამჭერები კი ყოფილი პრეზიდენტის გათავისუფლებას ითხოვენ. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.