თემურ შაშიაშვილი პოლიტიკურად მოტივირებულ დეზინფორმაციას უწოდებს პაატა ბურჭულაძის განცხადებას იმის შესახებ, რომ ის ქუთაისის ოპერის თეატრში არ შეუშვეს.
შაშიაშვილი ამბობს, რომ მისი მერობის დროს, მომღერალს საპატიო ქუთაისელის წოდება მიანიჭა და საჩუქრად მწვანეყვავილას პანთეონთან მდებარე მიწის ნაკვეთი გადასცა, სადაც მუსიკალური კომპლექსი უნდა აეშენებინა.
პოლიტიკოსის თქმით, ბურჭულაძემ ტერიტორია გაყიდა და ქუთაისით არასდროს დაინტერესებულა. ქალაქის ყოფილი მერი დღეს პანთეონთან თავად საოპერო მომღერალსაც ელოდებოდა, რადგან მისი თქმით, სასაუბროდ მოიწვია, თუმცა ადგილზე პაატა ბურჭულაძე არ გამოჩენილა.
„ქუთაისის საპატიო მოქალაქეა. არასდროს რაიმე კეთილი განწყობა არ გამოუხატავს. არც ოპერის თეატრში მინახავს ბატონი ბურჭულაძე, არ მინახავს ქალაქის მერიაში მისული, სანამ მე ვიყავი მერი და გული მწდება ყველა იმ პიროვნებაზე, ვინც ამ პროცესის მონაწილე გახდა, გალანძღეს ქუთაისი და ოპერის თეატრი“, – განაცხადა შაშიაშვილმა.
ცნობილმა საოპერო მომღერალმა პაატა ბურჭულაძემ 26 ოქტომბერს სოციალურ ქსელში გაავრცელა ინფორმაცია, რომ ქუთაისის ოპერის თეატრში არ შეუშვეს.