საპარლამენტო უმრავლესობის წევრის ბექა დავითულიანის განცხადებით, „ნაცმოძრაობის“ მერობის კანდიდატმა ნიკა მელიამ ადგილობრივი არჩევნების მეორე ტურში სტრატეგია შეცვალა.
„პირველ ტურში მელიას ერთი სიტყვა არ დასცდენია თბილისში რას გააკეთებდა, მას ამაზე წარმოდგენა არ ჰქონდა. მორჩა პირველი ტური და მიხვდა, რომ აგრესიითა და სააკაშვილის ჩამოყვანით მიიღო მაქსიმუმი, ეს იყო დაახლოებით 160 ათასი ხმა“, – ამის შესახებ საპარლამენტო უმრავლესობის წევრმა, ბექა დავითულიანმა გადაცემა „იმედი LIVE“-ში „ნაციონალურ მოძრაობაზე“ საუბრისას განაცხადა.
მისი თქმით, თვითმმართველობის არჩევნების მეორე ტურისთვის მელიამ გამოყარა უცნაური „მესიჯები“.
„სკოლაში ბავშვთა კვება კარგია, სახელმწიფოს საშუალება რომ ჰქონდეს, სკოლებში ბავშვები უნდა კვებოს. ამაზე მსჯელობა მიდიოდა განათლების სამინისტროსთანაც. ასეთი ინიციატივა არსებობდა ჩვენი ხელისუფლების შიგნითაც. თუმცა ამის დათვლა მიდის ახლაც, ვის შეგიძლია მიაწოდო საკვები და რა სეგმენტს. „ნაცმოძრაობამ“ ეს დაპირება გამოიტანა ხარჯების დაუთვლელად, რაღაც ხომ უნდა ეთქვათ.
ამ განცხადებას ემხრობა „გირჩი“, რომელიც კოალიციაში მემარჯვენე ფლანგს წარმოადგენს. ამ დრომდე არაა დათვლილი რამდენი მილიონია საჭირო სკოლებში ბავშვთა კვებისთვის. ასევე მელია 100-ლარიან დანამატს ჰპირდება თბილისელ პენსიონერებს. ეს დაახლოებით 250 მილიონი ლარია და მათ ეს თანხა დათვლილიც არა აქვთ. ბაღები თბილისის მუნიციპალიტეტს 300 მილიონი ლარი უკვე უჯდება. სკოლები მუნიციპალიტეტში არ შედის. გასაგებია, რომ ესაა სუბსიდია, მაგრამ რა გიჯდება, ხომ უნდა დათვალო. მესამე დაპირება იყო 100 სტუდენტი საზღვარგარეთ. წელიწადში 200 სტუდენტი მაინც იგზავნება „ქართული ოცნების“ პირობებში საზღვარგარეთ. ასე წამოისროლეს რაღაც დაპირებები, რასაც უკან არაფერი უდგას“, – აღნიშნა დავითულიანმა.
თვითმმართველობის არჩევნების მეორე ტური 30 ოქტომბერს 5 თვითმმართველ ქალაქში, 15 მუნიციპალიტეტსა და 24 საარჩევნო ოლქში გაიმართება.