დონალდ ტრამპი კონგრესიდან ადამ კინზინგერის წასვლაზე: ეს მეორეა – კიდევ რვა დარჩა

„ეს მეორეა – კიდევ რვა დარჩა“, – ნათქვამია დონალდ ტრამპის განცხადებაში.

შეგახსენებთ, რომ 6 იანვრის მოვლენების საქმეზე აშშ-ის წარმომადგენელთა პალატაში ათმა „რესპუბლიკელმა“ კონგრესმენმა დონალდ ტრამპის იმპიჩმენტს მხარი დაუჭირა. მანამდე „რესპუბლიკელმა“ კონგრესმენმა ენტონი გონსალესმა, რომელმაც ტრამპის იმპიჩმენტს მხარი დაუჭირა, განაცხადა, რომ გაისად აშშ-ის კონგრესის შუალედურ არჩევნებში კენჭს არ იყრის.

„რესპუბლიკელმა“ კონგრესმენმა, ადამ კინზინგერმა აშშ-ის კონგრესის დატოვების გადაწყვეტილება მიიღო.

კონგრესმენის განცხადებით, ის გაისად აშშ-ის კონგრესის შუალედურ არჩევნებში კენჭს არ იყრის.

„რესპუბლიკელი“ კონგრესმენი აშშ-ის ყოფილი პრეზიდენტის, დონალდ ტრამპის კრიტიკით გამოირჩეოდა.

„კონგრესში მე დავინახე, განხეთქილებამ როგორ გაიმაგრა ფესვები. უთანხმოების გადალახვის სურვილი არც თუ ისე დიდია და ერთიანობა უკვე აღარ არის ის სიტყვა, რომელსაც ვიყენებთ. ასევე ჩემთვის სულ უფრო ცხადი ხდება, რომ არ შემიძლია ფოკუსირება კონგრესში ხელახლა არჩევასა და უფრო ფართო ბრძოლაზე ქვეყნის მასშტაბით“, – აღნიშნა ადამ კინზინგერმა.