მჯერა, რომ არც თბილისელებს, არც რომელიმე სხვა ქალაქში მცხოვრებ ჩემს თანამემამულეებს, შავისა და თეთრის გარჩევა, სწორი არჩევანის გაკეთება გაუჭირდება. ყველაფერი ცხადია და ძალიან კარგად ვხედავთ ჩვენ არსებულ რეალობას, – ამის შესახებ „ქართული ოცნების“ გენერალურმა მდივანმა და დედაქალაქის მერობის კანდიდატმა, კახა კალაძემ ბრიფინგზე განაცხადა.
მან კიდევ ერთხელ მოუწოდა თითოეულ მოქალაქეს, მხარდამჭერს, ვისაც ჯერ კიდევ არ დაუფიქსირები საკუთარი პოლიტიკური პოზიცია, არ დაიზაროს და მივიდეს საარჩევნო უბნებზე.
„არჩევნების დასრულებამდე ორი საათი რჩება, ამიტომ მინდა ვთხოვო და მოვუწოდო თითოეულ მოქალაქეს, თითოეულ ჩვენს მხარდამჭერს, ვისაც ჯერ კიდევ არ დაგიფიქსირებიათ საკუთარი პოლიტიკური პოზიცია, არ დაიზაროთ მიდით საარჩევნო უბნებზე და შეიტანეთ საკუთარი წვლილი ჩვენი ქვეყნის, ჩვენი ქალაქების გამარჯვებაში;
მიდით საარჩევნო უბნებზე, რათა ერთხელ და საბოლოოდ დავასრულოთ ჩვენს ქვეყანაში დესტრუქციაზე, ზიზღსა და რევანშზე ორიენტირებული პოლიტიკური დღის წესრიგი; მიდით არჩევნებზე, რათა ქვეყანაში საბოლოოდ დაისადგუროს მშვიდობამ და კარი გავუხსნათ ქვეყნის განვითარებაზე, მომავლის რწმენაზე ორიენტირებულ პოლიტიკას.
ჩვენი ქვეყნის, ჩვენი ქალაქების მომავალი ჩვენივე ხელშია, ამიტომ თითოეული თქვენგანი, აუცილებლად უნდა მივიდეს საარჩევნო უბნებზე და გააკეთოს არჩევანი, მონაწილეობა მიიღოს ჩვენი ქვეყნისა და ქალაქის მომავლის განსაზღვრაში. მჯერა, რომ არც თბილისელებს, არც რომელიმე სხვა ქალაქში მცხოვრებ ჩემს თანამემამულეებს, შავისა და თეთრის გარჩევა, სწორი არჩევანის გაკეთება გაუჭირდება. ყველაფერი ცხადია და ძალიან კარგად ვხედავთ ჩვენ არსებულ რეალობას.
ამიტომ, ყველა ვისაც ამის შესაძლებლობა გაქვთ უნდა მიხვიდეთ და საარჩევნო ყუთებთან გამოხატოთ თქვენი პოზიცია.
გამარჯვება უნდა მივიყვანოთ ბოლომდე!“, – განაცხადა კალაძემ.