თუ ოპოზიცია ამ საქმეში შემოგვიერთდება, ქვეყნისთვის კარგი იქნება, თუ არ – ჩვენ დემოკრატიული პრინციპების გასაძლიერებლად ძირითადი საქმე უკვე გაკეთებული გვაქვს, – ამის შესახებ საპარლამენტო უმრავლესობის წევრმა, ირაკლი ქადაგიშვილმა „ქრონიკაში“ ჩართვისას საკონსტიტუციო ცვლილებებზე საუბრისას განაცხადა.
მისი თქმით, საკონსტიტუციო ცვლილებების განხორციელება მეორე და მესამე მოსმენით საშემოდგომო სესიაზე იგეგმება. ქადაგიშვილმა განმარტა, რომ საჭიროა ოპოზიციის მაქსიმალური ჩართულობა, რათა კანონის შესაბამისად, საკონსტიტუციო ცვლილებებისთვის საჭირო ხმათა რაოდენობა მოგროვდეს.
„აღნიშნულიდან გამომდინარე, ახლა ჯერი ოპოზიციაზეა. წინა ხელისუფლების დროს გვქონდა კონსტიტუცია, რომელიც ძალაუფლების კონცეტრაციის ხარისხით პუტინის კონსტიტუციასაც აღემატებოდა. მიხეილ სააკაშვილს რომ დასჭირდა, ორი ვადის გასვლის შემდეგ ხელისუფლებაში დარჩენილიყო, მოახდინეს ამ კონსტიტუციის ტრანსფორმირება. მივიღეთ გაურკვეველი ჰიბრიდი, რომელიც არც საპრეზიდენტო და არც საპარლამენტო იყო, ანუ ერთგვარი მახინჯი ფორმა – მათ რეალობას მორგებული.
დღეს ჩვენ გვაქვს რეალურად ევროპული სტანდარტის საპარლამენტო რესპუბლიკის შესაბამისი კონსტიტუცია; 1918-21 წლების დამოუკიდებელი საქართველოს კონსტიტუციის მართლაც პირდაპირი სამართალმემკვიდრე. აღნიშნულიდან გამომდინარე, „ქართულმა ოცნებამ“ ეს გზა გაიარა და მრავალი სხვა რეფორმა გატარდა ამ მიმართულებით. ასე, რომ თუ ოპოზიცია ამ საქმეში შემოგვიერთდება, ქვეყნისთვის კარგი იქნება, თუ არ – ჩვენ დემოკრატიული პრინციპების გასაძლიერებლად ძირითადი საქმე უკვე გაკეთებული გვაქვს. რასაც ხელს დააკლებენ, ეს ისევ მათი ინტერესების საწინააღმდეგო იქნება. ამდენად, ვფიქრობ, ოპოზიციაშიც არ არსებობს ის სულისკვეთება, რომ პარლამენტი დატოვონ“, – განაცხადა ქადაგიშვილმა.