ისრაელის მთავრობის წევრი აცხადებს, რომ ორშაბათს გლაზგოში გაერო-ს კლიმატურ კონფერენციას ვერ დაესწრო, რადგან ის არ იყო ადაპტირებული ეტლით მოსარგებლეთათვის. ინფორმაციას ამის შესახებ „ბიბისი“ ავრცელებს.
როგორც ისრაელის ეროვნული ინფრასტრუქტურის, ენერგიისა და წყლის რესურსების მინისტრმა, კარინ ელჰარარმა სოციალურ ქსელ „ტვიტერში“ დაწერა, სამწუხაროა, რომ გაერო არ უზრუნველყოფს წვდომას თავის ღონისძიებებზე.
ისრაელის პრემიერ-მინისტრის, ნაფტალი ბენეტის დელეგაციის წარმომადგენელმა განაცხადა, რომ ღონისძიების ორგანიზატორებს მომხდარის გამო საჩივრით ფორმალურად მიმართეს. დელეგაციის ცნობით, პრემიერ-მინისტრმა ბენეტმა კი აღნიშნა, რომ არ დაესწრება ღონისძიებას სამშაბათს, თუ კარინ ელჰარარისთვის სამიტზე წვდომა არ იქნება უზრუნველყოფილი.
ისრაელის მთავრობის წევრს ბოდიში მოუხადა ისრაელში დიდი ბრიტანეთის ელჩმა, ნეილ უიგანმა. დიდი ბრიტანეთის საგარეო საქმეთა სამინისტროში განაცხადეს, რომ კარინ ელჰარარს ესაუბრა და მოუთმენლად ელოდება მასთან სამშაბათს შეხვედრას.
როგორც ელჰარარის ოფისმა ისრაელის მედიას განუცხადა, მინისტრი გლაზგოში ღონისძიებაზე დასწრებას ორი საათის განმავლობაში გარეთ ელოდებოდა, რს შემდეგაც ის იძულებული გახდა, ედინბურგში, სასტუმროში დაბრუნებულიყო.