საქართველოს ჯანდაცვის მინისტრის მოადგილის თამარ გაბუნიას განცხადებით, ჯანდაცვის სამინისტროში კლინიკური საბჭოს წევრებთან შეხვედრაზე კორონავირუსით ინფიცირებული, ჰოსპიტალიზებული პაციენტების მკურნალობაში მონოკლონური ანტისხეულების გამოყენების შესახებ იმსჯელეს.
თამარ გაბუნიამ სამკურნალო მედიკამენტების გადმოცემისთვის გერმანიის მთავრობას მადლობა გადაუხადა.
„კიდევ ერთხელ იყო მსჯელობა, თუ რა პროტოკოლით მოხდება მონოკლონური ანტისხეულების გამოყენება, რომელიც ქვეყანამ მიიღო დონაციის სახით გერმანიის მთავრობისიგან. კიდევ ერთხელ დიდი მადლობა მინდა, ვუთხრა ამისთვის გერმანიის მთვრობას, რომელიც დაგვეხმარა ამ პროცესში. ასევე მონოკლონური ანტისხეულები, რომლებიც მივიღეთ ჩვენ ამერიკის მხარისგან, ესეც არის ქვეყანაში და მზად ვართ, მათი გამოყენება დაიწყოს“, – განაცხადა თამარ გაბუნიამ.
გერმანიის ფედერაციული რესპუბლიკის მთავრობამ საქართველოს მონოკლონური ანტისხეულები პირველ ნოემბერს გადასცა. დონაცია 3 000 დოზაზე მეტ კასირივიმაბისა და იმდევიმაბისგან შედგება. როგორც ჯანდაცვის სამინისტროში აცხადებენ, მონოკლონური ანტისხეულების გამოყენება „კოვიდ-19“-ით ინფიცირებული, ჰოსპიტალიზებული პაციენტების სამკურნალოდ მოხდება.