მიხეილ სააკაშვილი 36-ე დღეა შიმშილობს. მსჯავრდებული ექსპრეზიდენტის პირადი ექიმის ინფორმაციით, სააკაშვილის ტესტებში დრამატული ცვლილება არ არის, თუმცა მდგომარეობა უარესდება.
ასევე, ნიკოლოზ ყიფშიძის თქმით, მიხეილ სააკაშვილი წყვეტს კონსილიუმთან შეხვედრებს და მოითხოვს ალტერნატიული კონსილიუმის შექმნას, რომელშიც შევა მისი პირადი ექიმი ჰოლანდიიდან.
„ვერ ვიტყვი, რომ დრამატული ცვლილებები იყო ტესტებში, თუმცა მდგომარეობა უარესდება. გავესაუბრეთ პრეზიდენტს და მისი მდგომარეობა პრაქტიკულად იგივე იყო, რაც გუშინ. ბატონმა პრეზიდენტმა განაცხადა, რომ მას უნდა, ნახოს ალტერნატიული კონსილიუმი, რომელშიც შედის მისი პირადი ექიმი ჰოლანდიიდან. ეს იმიტომ არა, რომ პირველი კონსილიუმი ცუდი იყო ან რამე პრობლემები, არავითარ შემთხვევაში, ორივე კომისია მოსწონს, მაგრამ უნდა, რომ ალტერნატიული ნახოს“, – განაცხადა ყიფშიძემ.