სპეციალური პენიტენციური სამსახურის ხელმძღვანელის ნიკა ცხვარიაშვილის განცხადებით, პატიმარი მიხეილ სააკაშილი იღებს საკვებ დანამატებსა და ნატურალურ წვენებს.
„პატიმარმა მიხეილ სააკაშვილმა გარკვეული პერიოდია რაც დაიწყო მიღება საკვები დანამატების, მათ შორის თხევადი და არათხევადი სახით, ასევე ნატურალურ წვენებს,“- ამის შესახებ ქრონიკას ნიკა ცხვარიაშვილმა განუცხადა.
მისი თქმით, მიხეილ სააკაშვილმა ეს პერიოდი განვლო დანამატების მიღების ხარჯზე. „აღნიშნული ითვლება კვებად, იმიტომ, რომ არის შიმშილობის რამდენიმე მიმართულება – აბსოლუტური, სრული და არასრული. ამ შიმშილობის არცერთ სახეობაში არაა ის, რომ პირმა მიიღოს რაღაც და ეს შიმშილობაში ჩაეთვალოს“, – აღნიშნა ცხვარიაშვილმა.
საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. პატიმრობაში მყოფმა სააკაშვილმა შიმშილობა გამოაცხადა, მხარდამჭერები კი ყოფილი პრეზიდენტის გათავისუფლებას ითხოვენ. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.