“გამოცხადდეს 7 ნოემბერი ღირსების დღესასწაულად” – ეს განცხადება გია გაჩეჩილაძემ აქციაზე „არ აგარევინებთ“ განაცხადა, რომელიც პარლამენტის წინ იმართება.. აქციის მონაწილეები 2007 წლის 7 ნოემბერს ხელისუფლების მიერ აქციის მონაწილეებზე ძალადობას აპროტესტებს.
„მინდა გითხრათ, რომ ღირსების დღეა 7 ნოემბერი და ყველა იმ ადამიანის დღე, ვინც ამ 20 წლის განმავლობაში ღირსება შეინარჩუნა. არ დაკარგა, მიუხედავად ყველანაირი ზეწოლისა, იმიტომ რომ ეს დღე დაიწყო 2 ნოემბერს და მოშიმშილეები აქ დასხდნენ 7 ნოემბერს. იქიდან იწყება მთელი კოშმარი. კი, მართალია, მანამდე იყო ბუტა, მანამდე იყო სანდრო. მაგრამ მასიური ტერორი იწყება ზუსტად 7 ნოემბრიდან. ამიტომ, ვიფიქრე და თუ შეიძლება ერთად მივმართოთ და ვთხოვოთ ხელისუფლებას, რომ 7 ნოემბერი გამოცხადდეს ღირსების დღესასწაულად“, – განაცხადა გაჩეჩილაძემ.
ინფორმაციისთვის, მიხეილ სააკაშვილის ხელისუფლების შეცვლის მოთხოვნით ოპოზიციის საპროტესტო აქციები 2007 წლის 3 ნოემბერს დაიწყო და პარლამენტის წინ კარვები გაშალა. პარალელურად, ახელმწიფო დაწესებულებებთან “სირცხვილის კორიდორები” ეწყობოდა. აქცია პოლიციის მიერ მისი მონაწილეთა დაშლით, ცრემლსადენი აირის, ხელკეტების, რეზინის ტყვიების, აკუსტიკური თოფებისა და წყლის ჭავლის გამოყენებით, ტელეკომპანია “იმედში” სპეცრაზმის შეჭრითა და ქვეყანაში საგანგებო მდგომარეობის გამოცხადებით დასრულდა.
პოლიტიკური კრიზისის საპასუხოდ მაშინდელმა პრეზიდენტმა მიხეილ სააკაშვილმა 15 დღით საგანგებო მდგომარეობა გამოაცხადა და ვადამდელი საპრეზიდენტო არჩევნები დანიშნა.