მიანმარში ამერიკელ ჟურნალისტ დენი ფენსტერს 11 წლით თავისუფლების აღკვეთა მიუსაჯეს. ინფორმაციას ამის შესახებ სააგენტო Reuters-ი ავრცელებს.
37 წლის დენი ფენსტერი ონლაინ გამოცემა Frontier Myanmar-ის რედაქტორია. ის მიმდინარე წლის მაისში დააკავეს.
სასამართლომ ამერიკელი ჟურნალისტი დამნაშავედ ცნო წაქეზებასა და იმიგრაციისა და უკანონო გაერთიანებების შესახებ კანონის დარღვევაში. დენი ფენსტერი პირველი დასავლელი ჟურნალისტია, რომელიც მიანმარში მიმდინარე წლის თებერვალში მომხდარი სამხედრო გადატრიალების შემდეგ დააპატიმრეს.
ჟურნალისტი ბრალს არ აღიარებს და აცხადებს, რომ დაკავება პოლიტიკურად მოტივირებულია.
1-ელ თებერვალს მიანმარში სამხედროებმა სახელმწიფო მრჩეველი, აუნ სან სუ ჩი და ქვეყნის პრეზიდენტი, ვინ მიინი დააკავეს. სამხედროებმა ქვეყანაში ერთწლიანი საგანგებო მდგომარეობა გამოაცხადეს.