შინაგან საქმეთა სამინისტროს სტრატეგიული კომუნიკაციების დეპარტამენტი განცხადებას ავრცელებს.
“გვსურს გამოვეხმაუროთ, ტელეკომპანია “მთავარის” ეთერში გასულ ცრუ და მიზანმიმართულად გაყალბებულ ინფორმაციაზე აგებულ სიუჟეტს, თითქოს განსაკუთრებულ დავალებათა დეპარტამენტის რიგები ბოლო პერიოდში, არასათანადო პირობების გამო ათეულობით თანამშრომელმა დატოვა.
სიუჟეტის შესავალშიც და წამყვანის დასკვნაშიც ნათლად ჩანდა სიუჟეტის მიზანი, პოლიციელების და სპეცდანიშნულების რაზმის თანამშრომელთა დემორალიზება.
სიუჟეტში ნათქვამი არც ერთი ინფორმაცია არ შეესაბამება სიმართლეს და მიზანმიმართულად არის გაყალბებული.
დასაწყისშივე, სანამ უშუალოდ ციფრებით გამყარებულ და გადამოწმებას დაქვემდებარებულ სწორ ინფორმაციას ვაცნობებთ საზოგადოებას, გვსურს აღვნიშნოთ, რომ განსაკუთრებულ დავალებათა დეპარტამენტი წარმოადგენს შინაგან საქმეთა სამინისტროს უმნიშვნელოვანეს, მოწინავე დანაყოფს. აღნიშნული დეპარტამენტის თანამშრომლებს განსაკუთრებული ფუნქცია აკისრიათ ქვეყნის უსაფრთხოების დაცვის, მათ შორის ოკუპირებული ტერიტორიების მიმართულებით.
განსაკუთრებულ დავალებათა დეპარტამენტის თანამშრომელთა კვება რეგულირდება შინაგან საქმეთა მინისტრის შესაბამისი ბრძანებით.
აღიშნული ბრძანებით განსაზღვრული ნორმების შესაბამისად ყოველდღიური კვების რაციონი შედგენილია 42 სხვადასხვა დასახელების პროდუქტისაგან.
ამ პროდუქტების შესყიდვა ხორციელდება სახელმწიფო შესყიდვების კანონმდებლობის დაცვით, კონკურენციის პირობებში ჩატარებული ტენდერების საშუალებით. თითოეული პროდუქტის ტექნიკური პარამეტრები შედგენილია და აკმაყოფილებს უმაღლესი ხარისხის მოთხოვნებს, რასაც ადასტურებს ხარისხის შესაბამისობის სერთიფიკატები და საქართველოში აკრედიტებული ლაბორატორიების დასკვნები.
მაყურებელს აღნიშნული ტელეკომპანიის მიერ მომზადებული სიუჟეტებიც კარგად ემახსოვრება, სადაც პოლიციელების პირობების გაუმჯობესებისთვის გამოცხადებულ თითოეულ მსგავს ტენდერს განსაკუთრებული კრიტიკა და ბიუჯეტის “ფლანგვის” შეფასებები ახლავს. მსგავსი მიდგომები კიდევ ერთხელ ცხადყოფს მედიაორგანიზაციის ორმაგ სტანდარტს.
სიუჟეტში ნაჩვენები კადრები, რომელიც ინტერპრეტირებულ იქნა თითქოს პოლიციელებს “ასფალტზე დაყრილ” საკვებს აჭმევენ, რეალურად არის საველე პირობებში მყოფი თანამშრომლების კვებისთვის განკუთვნილი დამატებითი ულუფა და არა ძირითადი ე.წ. საქვაბე კვებისთვის განკუთვნილი პროდუქტები.
რაც შეეხება, სპეციალურ სამოსს – ოფიცრებისათვის 2019 წლიდან ხორციელდება გერმანული წარმოების ზაფხულის სეზონის მოდელის ფეხსაცმლის შეძენა. ხოლო, 2020 წლიდან შეძენილი იქნა გერმანული წარმოების ზამთრის სეზონის ფეხსაცმელი.
2020-2021 წლებში განსაკუთრებულ დავალებათა დეპარტამენტის ვადიან სამხედრო სავალდებულო მოსამსახურის და სპეციალური წოდების მქონე ოფიცრისათვის შეძენილი იქნა 9 187 077,97 ლარის ოდენობის უნიფორმა, ფეხსაცმელი და შესაბამისი აღჭურვილობა.
თანამშრომლები აღიჭურვნენ გერმანული წარმოების სპეციალური აღჭურვილობებით.
ასევე გაუმჯობესდა და განახლდა დანაყოფების რადიოკავშირის (კავშირგაბმულობის) საშუალებები.
მიმდინარე წლის ოქტომბრის თვეში განსაკუთრებულ დავალებათა დეპარტამენტის თანამშრომლებს ,,გლოკის“ სისტემის სამსახურებრივ-საშტატო იარაღი – პისტოლეტები გადაეცათ. ბოლო წლების განმავლობაში, შინაგან საქმეთა სამინისტროს სისტემაში ეს იყო ყველაზე მასშტაბური გადაიარაღება.
რაც შეეხება კიდევ ერთ ყალბ ინფორმაციას უწყებიდან თანამშრომელთა მასობრივ გადინებას, აღნიშნულიც არის სიცრუე და გადაუმოწმებელი ინფორმაცია.
შინაგან საქმეთა სამინისტრო არის ქვეყანაში ერთ-ერთი ყველაზე მრავალრიცხოვანი ორგანიზაცია, სადაც ერთეულ თანამშრომელთა შიდა გადაადგილება, როტაცია და განახლება უწყვეტი სამუშაო პროცესის განუყოფელი ნაწილია.
კიდევ ერთხელ ხაზგასმით აღვნიშნავთ, რომ მედიასაშუალებების მიერ მსგავსი ცრუ, ცილისმწამებლური და მიზანმიმართულად გაყალბებული ინფორმაციის გავრცელების მიზანია, შინაგან საქმეთა სამინისტროს თანამშრომელთა დემორალიზება, საზოგადოებაში უწყების იმიჯის შელახვა და პოლიციელის პროფესიული საქმიანობის დისკრედიტაცია.”-ნათქვამია განცხადებაში.