ევროკავშირი შავ სიაში შეიყვანს სატრანსპორტო კომპანიებს, რომლებიც ადამიანების ტრეფიკინგში არიან ჩართული. „ევრონიუსის“ ცნობით, შესაბამისი გეგმა ევროკომისიამ წარადგინა.
კანონპროექტი გავრცელდება ყველა სახის ტრანსპორტზე – სახმელეთო, საჰაერო, საზღვაო და უფლებას მისცემს აღმასრულებელ ხელისუფლებას, შეაჩეროს მთელი რიგი უფლებები, მათ შორის სატრანსპორტო მომსახურების მიწოდების, ევროკავშირის ტერიტორიაზე ფრენისა და ტრანზიტის, საწვავის შევსებისა და ტრანსპორტირების უფლება.
ბრიუსელში ფიქრობენ, რომ ერთ-ერთი ეჭვმიტანილი ბელარუსის სახელმწიფო ავიაკომპანია „ბელავიაა“, რომელიც დაეხმარა ბელარუსის პრეზიდენტს, ალექსანდრე ლუკაშენკოს მიგრანტების მიყვანაში ახლო აღმოსავლეთიდან და აფრიკის ქვეყნებიდან მინსკში, სადაც ისინი შემდეგ გადაიყვანეს პოლონეთის, ლატვიის და ლიეტუვის საზღვრებთან.