„სამხრეთ აფრიკაში აღმოჩენილი კოვიდ 19-ის ახალი ვარიანტი შესაძლოა, უფრო გადამდები იყოს, ვიდრე “დელტა” შტამი და ვაქცინები შეიძლება ნაკლებად ეფექტიანი იყოს მის წინააღმდეგ”, – ამის შესახებ ბრიტანეთის ჯანდაცვის მინისტრმა საჯიდ ჯავიდმა განაცხადა.
მისი თქმით, კოვიდის ახალი ვარიანტის „ნუს” გაჩენა უზარმაზარ საერთაშორისო შეშფოთებას იწვევს.
„სრულიად შესაძლებელია, რომ ახალი შტამი აფრიკის ქვეყნების ფარგლებს გარეთ გავრცელდა, სადაც ვარაუდობენ, რომ განვითარდა, მაგრამ დიდ ბრიტანეთში ჯერ არცერთი შემთხვევა არ გამოვლენილა, განუცხადა ჯანდაცვის მინისტრმა დეპუტატებს და დასძინა, რომ ახალი ვარიანტი, ცნობილი როგორც B1.1.529, პირველად ჰონგ კონგში აღმოაჩინეს და ის სამხრეთ აფრიკაში მოგზაურობას უკავშირდება.
„დიდი ბრიტანეთი იყო პირველი ქვეყანა, რომელმაც დაადგინა ამ ახალი ვარიანტის პოტენციური საფრთხე და გააფრთხილა საერთაშორისო პარტნიორები.
დამატებითი შემთხვევები გამოვლინდა სამხრეთ აფრიკაში და ბოტსვანაში და დიდია ალბათობა, რომ ის ახლა სხვა ქვეყნებში გავრცელდეს. ჩვენ შეშფოთებულნი ვართ, რომ ამ ახალმა ვარიანტმა შეიძლება სერიოზული საფრთხე შეუქმნას საზოგადოებრივ ჯანმრთელობას. კორონავირუსის ახალ ვარიანტს აქვს უჩვეულოდ დიდი რაოდენობით მუტაციები.
ადრეული კვლევები აჩვენებს, რომ ეს ვარიანტი შეიძლება უფრო გადამდები იყოს, ვიდრე დელტას ვარიანტი და ამჟამინდელი ვაქცინები შეიძლება ნაკლებად ეფექტიანი იყოს მის წინააღმდეგ”, – ამბობს საჯიდ ჯავიდი.