„აღმოსავლეთ პარტნიორობის“ სამიტი საქართველოს, მოლდოვასა და უკრაინის ევროკავშირთან დაახლოების მისწრაფებების მხარდაჭერას დაადასტურებს, თუმცა ევროკავშირის მომავალ წევრობასთან დაკავშირებით დაპირება არ გაკეთდება. ინფორმაციას ამის შესახებ სააგენტო Reuters-ი „აღმოსავლეთ პარტნიორობის“ სამიტის დეკლარაციის პროექტზე დაყრდნობით ავრცელებს.
საინფორმაციო სააგენტო Reuters-ი აღნიშნავს, რომ საქართველოს, მოლდოვასა და უკრაინას ერთ მშვენიერ დღეს ევროკავშირში გაწევრიანება სურთ და ივლისში, სამეულმა ხელი მოაწერა ერთობლივ დეკლარაციას ევროკავშირში ინტეგრაციის მიზნით.
სამიტის დეკლარაციის ამონარიდი, რომელსაც Reuters-ი გაეცნო, ცხადყოფს, რომ ევროკავშირი აღიარებს პარტნიორების ევროპულ მისწრაფებებსა და ევროპულ არჩევანს.
დეკლარაციის წინასწარი პროექტის მიხედვით, ევროკავშირის ლიდერები პარტნიორების სუვერენულ უფლებას დაადასტურებენ, თავად აირჩიონ საკუთარი ამბიციის დონე, რომლის საფუძველზეც ევროკავშირთან ურთიერთობებისკენ მიისწრაფვიან.
„აღმოსავლეთ პარტნიორობის“ სამიტი 15 დეკემბერს გაიმართება.