საფრანგეთში, ყალბი კოვიდპასპორტების გამო, 400 საქმეა გახსნილი, – ამის შესახებ ქვეყნის შს მინისტრმა განაცხადა.
ერთ-ერთი ყველაზე გახმაურებული საქმე პარიზის რეგიონულ ჰოსპიტალში კოვიდით გარდაცვლილი ქალისაა – მას ვაქცინაციის ყალბი სერტიფიკატი ჰქონდა. როგორც საავადმყოფოს ინტენსიური თერაპიის ხელმძღვანელმა განაცხადა, მათ რომ სცოდნოდათ პაციენტის აუცრელობის შესახებ, სასწრაფოდ ანტისხეულებით მკურნალობას ჩაუტარებდნენ.
სამართალდამცველებმა, ქვეყნის მასშტაბით, რამდენიმე ათასი ყალბი კოვიდპასპორტი აღმოაჩინეს. შს მინისტრის, ჟერალდ დარმანინის თქმით, გამოძიება დაახლოებითმ 400 საქმეზეა დაწყებული, რამდენიმე მათგანში ექიმებიც ფიგურირებენ.
საფრანგეთში „მწვანე პასპორტი“ სჭირდება ყველას, ვისაც რესტორანში და საჯარო სივრცეებში შესვლა სურს.
ქვეყანაში ინფიცირების მაღალი მაჩვენებელი ფიქსირდება, ხელისუფლება „ბუსტერდოზების“ კამპანიას აძლიერებს იმ იმედით, რომ საავადმყოფოებში თავისუფალი ადგილები დარჩება. საფრანგეთის ინტენსიური თერაპიის ნახევარი კოვიდპაციენტებს უკავიათ, რეგიონების ნაწილში არასასწრაფო ოპერაციებს აუქმებენ, დღეში 100-ზე მეტი ადამიანი იღუპება კორონავირუსით.
ხელისუფლება ხურავს ღამის კლუბებს და ამკაცრებს სოციალური დისტანციის ზომებს, თუმცა ცდილობს, „ლოკდაუნის“ თავიდან არიდებას.
ჯანდაცვის მინისტრის თქმით, ეპიდემიის „ტალღა“ ძალიან მკაცრია, თუმცა არის ნიშნები, რომ ნელ-ნელა სუსტდება. მინისტრის ინფორმაციით, 65 წლის ზემოთ მოსახლეობის 90 პროცენტს „ბუსტერდოზა“ მიღებული აქვს.