აშშ-ის ყოფილმა სახელმწიფო მდივანმა და 2016 წლის საპრეზიდენტო კანდიდატმა, ჰილარი კლინტონმა განაცხადა, რომ თუ ტრამპი 2024 წელს გაიმარჯვებს, ეს ამერიკის დემოკრატიის დასასრული შეიძლება გახდეს.
„ახლა ფსონს რომ ვდებდე, ვიტყოდი, რომ ტრამპი კვლავ აპირებს კენჭისყრას. როგორც ჩანს, ის მიზნად ისახავს ამის გაკეთებას და თუ მას პასუხისგებაში არ მივცემთ, ის კვლავ გააკეთებს ამას. ვფიქრობ, ეს ჩვენი დემოკრატიის დასასრული შეიძლება იყოს. მსურს ხალხმა გაიგოს, რომ ეს გადამწყვეტი მომენტია. თუ მას კიდევ ერთხელ აირჩევენ პრეზიდენტად და მას კონგრესი ეყოლება, რომელიც მის ბრძანებებს შეასრულებს, ჩვენს ქვეყანას ვეღარ იცნობთ“, – აღნიშნა ჰილარი კლინტონმა.
8 ნოემბერს, დონალდ ტრამპმა განაცხადა, რომ 2024 წელს საპრეზიდენტო არჩევნებში მონაწილეობასთან დაკავშირებით განცხადებას, სავარაუდოდ, 2022 წლის კონგრესის შუალედური არჩევნების შემდეგ გააკეთებს.
„რა თქმა უნდა, ამაზე ვფიქრობ და ვნახოთ. ვფიქრობ, ბევრი ადამიანი ძალიან ბედნიერი იქნება ამ გადაწყვეტილებით და ალბათ, შუალედური არჩევნების შემდეგ გამოვაცხადებ ამ გადაწყვეტილებას“, – აღნიშნა დონალდ ტრამპმა ტელეკომპანია Fox News-თან ინტერვიუში.