პრემიების უკანონო გაცემის საქმეზე მსჯავრდებული საფრანგეთის ყოფილი შინაგან საქმეთა მინისტრი, კლოდ გეანი ციხეში მოათავსეს. ინფორმაციას ამის შესახებ ფრანგული მედია ავრცელებს.
2015 წელს, პარიზის სასამართლომ კლოდ გეანი დამნაშავედ ცნო პრემიების უკანონო გამოწერაში, რომელსაც თავად კლოდ გეანი და საფრანგეთის შინაგან საქმეთა სამინისტროს სხვა თანამშრომლები იღებდნენ.
გამოძიებამ დაადგინა, რომ 2002-2004 წლებში, როდესაც კლოდ გეანი საფრანგეთის შს სამინისტროს გენერალური დირექტორის მოვალეობებს ასრულებდა, საერთო ჯამში 210 000 ევროს მითვისება მოხდა. კერძოდ, პოლიციის ფონდიდან ყოველთვიურად 10 000 ევროს იღებდნენ, რომლის ნახევარს კლოდ გეანი იტოვებდა, ხოლო დანარჩენ თანხას თანაშემწეებს უნაწილებდა.
სასამართლომ მას 2 წლით (აქედან ერთი წელი პირობითი მსჯავრი) თავისუფლების აღკვეთა მიუსაჯა და 75 000 ევროს ოდენობის ჯარიმა დააკისრა. გარდა ამისა, მას 5 წლის განმავლობაში სახელმწიფო თანამდებობების დაკავება აეკრძალა. აღნიშნული განაჩენი 2017 წელს ჯერ სააპელაციო სასამართლომ, ხოლო 2019 წელს საკასაციო სასამართლომ დაადასტურა.
ასაკის გამო, კლოდ გეანმა მაშინ პირობით ვადამდე გათავისუფლებით ისარგებლა. ის ყოველთვიურად 3 000 ევროს იხდიდა ჯარიმისა და ზიანის ასანაზღაურებლად. თუმცა, მიმდინარე წლის 9 ნოემბერს პარიზის სააპელაციო სასამართლოს სასჯელაღსრულების პალატამ პირობითი მსჯავრი გააუქმა. გამოძიების შედეგად, სასამართლო დასკვნამდე მივიდა, რომ კლოდ გეანს შეეძლო მეტი გადაეხადა, კერძოდ, ოქროსა და საათის გაყიდვისა და სიცოცხლის დაზღვევის თანხების უკან დაბრუნების შედეგად მიღებული შემოსავლებიდან. ადვოკატის განცხადებით, კლოდ გეანი ციხეში 9 თვეს გაატარებს.
კლოდ გეანი ნიკოლა სარკოზის მთავრობაში შინაგან საქმეთა მინისტრის თანამდებობას 2011-2012 წლებში იკავებდა.