კორონავირუსის „ომიკრონი“ ვარიანტის გავრცელების ფონზე, ისრაელის მთავრობამ აშშ-ში, კანადაში, ევროპის რიგ ქვეყნებში, მაროკოსა და თურქეთში მოგზაურობის აკრძალვას მხარი დაუჭირა. ინფორმაციას ამის შესახებ ადგილობრივი მედია ავრცელებს.
ისრაელის მთავრობის მინისტრებმა მხარი დაუჭირეს ჯანდაცვის სამინისტროს ე.წ. „წითელი ქვეყნების“ სიის გაფართოების გეგმას, რომელიც შემდეგ ქვეყნებს მოიცავს: აშშ, კანადა, იტალია, ბელგია, გერმანია, უნგრეთი, მაროკო, თურქეთი, პორტუგალია და შვეიცარია.
ისრაელის მინისტრთა კაბინეტის გადაწყვეტილება საბოლოო დამტკიცებისთვის პარლამენტის საკონსტიტუციო კომიტეტს უნდა წარედგინოს. დამტკიცების შემთხვევაში, მოგზაურობის აკრძალვა 22 დეკემბრის 00:00 საათიდან ამოქმედდება.
მოგზაურებს, რომლებიც ისრაელში ე.წ. წითელ სიაში მყოფი ქვეყნებიდან ბრუნდებიან, ორკვირიანი კარანტინის გავლა მოეთხოვებათ, მიუხედავად ვაქცინაციის სტატუსისა.
25 ნოემბერს, სამხრეთ აფრიკაში, მეცნიერებმა განაცხადეს, რომ კორონავირუსის ახალი ვარიანტი აღმოაჩინეს, რომელსაც უამრავი მუტაცია აქვს. ჯანდაცვის მსოფლიო ორგანიზაციის მთავარმა მეცნიერმა, სუმია სვამინატანმა განაცხადა, რომ ახალ ვარიანტს სპაიკის პროტეინში არაერთი შემაშფოთებელი მუტაცია აქვს.
26 ნოემბერს, ჯანდაცვის მსოფლიო ორგანიზაციამ საგანგებო სხდომაზე სამხრეთ აფრიკაში გამოვლენილ კორონავირუსის ახალ ვარიანტს „შემაშფოთებელი“ უწოდა. ჯანდაცვის მსოფლიო ორგანიზაციაში აცხადებენ, რომ „ომიკრონთან“ დაკავშირებული საერთო რისკი კვლავ მაღალია.