გავლენების სფეროების ხანა დასრულდა და ჩვენ რუსეთთან მნიშვნელოვანი დიალოგისთვის მზად ვართ, – ამის შესახებ ნატო-ს გენერალურმა მდივანმა, იენს სტოლტენბერგმა რუმინეთის პრემიერ-მინისტრთან, ნიკოლაე ჩიუკასთანერთობლივ პრესკონფერენციაზე განაცხადა.
„ახალი წლიდან, რაც შეიძლება მალე ვაპირებ ნატო-რუსეთის საბჭოს ახალი სხდომის მოწვევას. რუსეთთან ნებისმიერი დიალოგი უნდა ეფუძნებოდეს ევროპის უსაფრთხოების ძირითად პრინციპებს და ნატო-ს შეშფოთებას რუსეთის ქმედებებთან დაკავშირებით და ეს უნდა მოხდეს ნატო-ს ევროპელ პარტნიორებთან, მათ შორის უკრაინასთან კონსულტაციით“, – განაცხადა სტოლტენბერგმა.
მისი თქმით, მან რუმინეთის პრემიერ-მინისტრთან შეხვედრაზე უკრაინის საზღვართან რუსული შეირაღებული ძალების თავმოყრის თაობაზე ისაუბრა.
„გამჭვირვალობისა და დეესკალაციის შესახებ საერთაშორისო მოწოდებების მიუხედავად, თავმოყრა გრძელდება. ნატო ყოველთვის მტკიცედ უპასუხებს ჩვენი უსაფრთხოების წინაშე მდგარ ნებისმიერ საფრთხეს, მათ შორის, საჭიროების შემთხვევაში ჩვენი კოლექტიური თავდაცვის პოზიციის გაძლიერებით. ჩვენ გავაკეთებთ ყველაფერს, რაც საჭიროა ყველა მოკავშირის უსაფრთხოებისა და თავდაცვის უზრუნველსაყოფად. ჩვენ ნათლად განვაცხადეთ, რომ უკრაინის წინააღმდეგ ნებისმიერი შემდგომი აგრესია ძალიან ძვირი იქნება. ჩვენ ასევე გავაგრძელებთ პოლიტიკურ და პრაქტიკულ მხარდაჭერას ჩვენი ახლო პარტნიორის, უკრაინის და მისი სუვერენიტეტის, ასევე ტერიტორიული მთლიანობის მიმართ. ჩვენ აგრეთვე ვუჭერთ მხარს ოფიციალური კიევის პოზიციას, თავად აირჩიოს საკუთარი გზა“, – განაცხადა სტოლტენბერგმა.