საკვებისა და მედიკამენტების სააგენტო- „სწრაფი ტესტირებისას შესაძლოა „ომიკრონის“ შტამის აღმოჩენა ვერ მოხდეს“

ამერიკის შეერთებული შტატების საკვებისა და მედიკამენტების სააგენტოს განცხადებით, პირველადი კვლევებით დგინდება, რომ ანტიგენის სწრაფი ტესტები „ომიკრონის“ შტამის მიმართ შესაძლოა არ იყოს სენსიტიური.
საკვებისა და მედიკამენტების სააგენტო, ქვეყნის ჯანდაცვის ეროვნულ ინსტიტუტებთან აღნიშნული საკითხის შესასწავლად თანამშრომლობს. კვლევის ფარგლებში ხდება „ომიკრონით“ დაავადებული პაციენტების ნიმუშების აღება და მათი შემოწმება სწრაფი ტესტებით იმის დასადგენად, ახერხებს თუ არა ანტიგენ-ტესტი ინფექციის აღმოჩენას.
სააგენტოს განცხადებით, ანტიგენის ტესტებს შეუძლიათ „ომიკრონის“ შტამის დეტექცია, თუმცა ნაკლებად სენსიტიურები არიან შტამის მიმართ, რაც იმას ნიშნავს, რომ ზოგიერთ შემთხვევაში შესაძლოა სწრაფმა ტესტებმა „ომიკრონით“ ინფიცირება ვერ დააფიქსირონ და მცდარი უარყოფოთი პასუხი აჩვენონ.
შეგახსენებთ, რომ ამერიკის შეერთებულ შტატებში „ომიკრონის“ შტამით ინფიცირების რეკორდულად მაღალი მაჩვენებელი ფიქსირდება, რის გამოც მოთხოვნა მნიშვნელოვნადაა გაზრდილი სახლის პირობებში სწრაფი ტესტირების ჩატარებაზე, რადგან „პისიარ“ ტესტირება გარკვეულ დროს და ლაბორატორიულ კვლევას საჭიროებს.