აშშ-ის ალერგიისა და ინფექციური დაავადებების ცენტრის დირექტორმა, ენტონი ფაუჩიმ განაცხადა, რომ კორონავირუსის „ომიკრონი“ ვარიანტი ნაკლებად მძიმე შეიძლება იყოს.
„როგორც ჩანს, ფაქტობრივად, „ომიკრონი“ ნაკლებად მძიმე შეიძლება იყოს. ყოველ შემთხვევაში, ამას ჩვენ მიერ სამხრეთ აფრიკასა და დიდ ბრიტანეთში შეგროვებული მონაცემები ცხადყოფს, მათ შორის აშშ-ში ზოგიერთი წინასწარი მონაცემებიც“, – აღნიშნა აშშ-ის ალერგიისა და ინფექციური დაავადებების ცენტრის დირექტორმა.
ენტონი ფაუჩის თქმით, ჯერ კიდევ არსებობს ჰოსპიტალიზაციის მაჩვენებლების ზრდის საშიშროება.
„ერთადერთი სირთულე ის არის, რომ როდესაც ამდენი შემთხვევა გაქვთ, მაშინაც კი, თუ ჰოსპიტალიზაციის მაჩვენებელი „ომიკრონის“ შემთხვევაში უფრო დაბალია, მაინც არსებობს საფრთხე, რომ ჰოსპიტალიზაციის მაჩვენებლები შეიძლება გაიზარდოს, რაც ტვირთად დააწვება ჯანდაცვის სისტემას“, – განაცხადა ენტონი ფაუჩიმ.
25 დეკემბრის მდგომარეობით, აშშ-ში კორონავირუსის დადასტურებული შემთხვევების 58.6% „ომიკრონ“ შტამზე მოდის. ენტონი ფაუჩის თქმით, ქვეყანაში უფრო მეტი შემთხვევა გამოვლინდება, რადგან „ომიკრონი“ „დელტაზე“ უფრო გადამდებია.