მგლების პოპულაციის რიცხოვნობის ზრდის კონტროლის მიზნით ნორვეგია ამ ზამთარს თავისი მგლების 60%-ს დახოცავს.
ნორვეგია ამ ზამთარში 51 მგელს დახოცავს და ქვეყნის ტერიტორიაზე მაქსიმუმ სამ სანაშენე წყვილს, ხოლო შვედეთ-ნორვეგიას შორის მცხოვრებ მგელთა ჩათვლით, ოთხიდან-ექვს წყვილამდე დატოვებს.
შვედეთში მონადირეებმა უკვე დახოცეს თავიანთი წლიური სამიზნის უმეტესი ნაწილი, 27 მგელი, ხოლო ნორვეგიის და შვედეთის მეზობელ ფინეთში, შვიდი წლის მანძილზე პირველად, პოპულაციის რიცხოვნობის კონტროლის მიზნით, 20 მგელს მოკლავენ.
ბუნებისდამცველები სკანდინავიის ნახევარკუნძულზე მდებარე ქვეყნებს დასავლეთ ევროპაში მგლებისთვის ყველაზე მტრული გარემოს შექმნასა და ევროკავშირის კანონების უგულებელყოფაში ადანაშაულებენ.
ნორვეგიის უდიდესი ცხოველთადამცველი ორგანიზაცია Noah-ის აღმასრულებელი დირექტორი სირი მარტინსენი აზრით, მგლები იმიტომ ხოცავენ, რომ ადამიანთა ერთ ნაწილს ისინი არ უყვართ.
ნორვეგია არ არის ევროკავშირის წევრი ქვეყანა, თუმცა მიერთებულია ბერნის კონვენციას, რომლის მიხედვითაც მგელი მკაცრად დაცულ ცხოველთა სახეობას მიეკუთვნება და მასზე ნადირობა აკრძალულია. ამის მიუხედავად, ნორვეგიის ტერიტორიის იმ 5%-ის ფარგლებშიც კი, რომელიც ხელისუფლებას მგლების დაცვის ზონად აქვს მონიშნული, ამ ზამთარს 25 მგელს მოკლავენ თუ სასამართლო Noah-ს და ბუნების მსოფლიო ფონდის (WWF) ერთობლივ სარჩელს არ დააკმაყოფილებს.
ფინეთის სოფლის და სატყეო მეურნეობის წარმომადგენელ სამი ნიემის თქმით, ფინეთში 300 მგელია, რაც უკანასკნელი ასწლეულის ყველაზე დიდი მაჩვენებელია.
ფინეთის ბუნებრივი რესურსების ინსტიტუტის თანახმად, მგლის გენეტიკურად ჯანმრთელი რაოდენობის პოპულაცია 500 ინდივიდს უნდა მოიცავდეს.
შვედეთის ველური ბუნების დამცველთა თქმით, მგლების პოპულაციის რიცხოვნება 2020-2021 წლისთვის 395 იყო და ამჟამად, შესაძლოა 300-ზე ქვემოთაა.
შვედეთს ევროკავშირის წინაშე გაცხადებული აქვს, რომ არ დაუშვებს მგლების პოპულაციის რიცხოვნობის 300-ზე ქვემოთ ჩამოსვლას, რაც არასამთავრობო ორგანიზაცია შვედეთის მტაცებელთა ასოციაციის (Svenska Rovdjursföreningen) თავმჯდომარე მაგნუს ორენბრანტის თქმით, ძალიან მცირე რიცხვია, მისი თქმით, შვედეთში 1000-ზე მგლისთვის საკმარისი საცხოვრებელი გარემოა.
ამ ზამთარს სანადიროდ შერჩეული მგლის ზოგიერთი ხროვის მახლობლად არ არის ფერმერული მეურნეობები. მგლებს არანაირი პრობლემები არ შეუქმნიათ ფერმერებისთვის, მაგრამ ამ ხროვების საცხოვრებელი ადგილები მნიშვნელოვანია ლოსებზე მონადირეებისთვის, მათ სურთ რომ იყოს ლოსების მრავალრიცხოვანი პოპულაცია, – ამბობს მაგნუს ორენბრანტი.
მონადირებს მგლები იმის გამოც ჰყავთ ათვალწუნებული, რომ ისინი ხშირად კლავენ ფრინველზე და ჩლიქოსნებზე ნადირობის დროს მონადირეთა დამხმარე ძვირადღირებულ ძაღლებს.
საოცარია, რომ ქვეყნები ღიად აკეთებენ იმას, რაც უკანონოა ევროკავშირის ჰაბიტატების დირექტივის მიხედვით. ამ ქვეყნებში მოსახლეობის დაბალი სიმჭიდროვის გათვალისწინებით, მტაცებლებთან ერთად ცხოვრება არ უნდა იყოს ძნელი, მაგრამ, როგორც ჩანს, მხედველობაში მიიღეს მონადირეთა ინტერესი და მათი ის არგუმენტი, რომ მგლები საშიშროებას წარმოადგენენ მონადირე ძაღლებისთვის, – ამბობს ძუძუმწოვრების დაცვის ევროპული ოფისის თავმჯდომარე, პროფესორი ფიონა მეთიუზი.