„რითაც მათ აქამდე თავი დაგვამახსოვრეს, ეს იყო საბჭოთა კავშირის ჰიმნის დაკვრა, მაგიდებზე ფეხით სიარული და მიხეილ სააკაშვილის წერილების მხატვრული კითხვა“, – აცხადებს საპარლამენტო უმრავლესობის წევრი რატი იონათამიშვილი „ნაციონალური მოძრაობის“ პარლამენტში შესაძლო შესვლის შესახებ დასმული კითხვის პასუხად.
მისი თქმით, ელის, რომ ეს პარტია იმავე რეჟიმით გააგრძელებს საპარლამენტო ცხოვრებას, რომლითაც გასული წლების განმავლობაში გამოირჩეოდა.
„სასურველია, ისინი შემოვიდნენ პარლამენტში, რათა საზოგადოებამ კიდევ ერთხელ დაინახოს, რომ მათ არც ქუჩაში და არც საპარლამენტო საქმიანობის დროს არაფრის უნარი არ აქვთ. ფაქტია, რომ „ნაციონალურ მოძრაობაში“ არის ძალიან მძიმე კრიზისი, რომელიც განაპირობა იმ უპასუხისმგებლო, არათანმიმდევრულმა დამოკიდებულებამ, რომელიც ზოგადად არსებობს ამ პარტიაში, რომელიც მათი არაფორმალური მმართველის, მიხეილ სააკაშვილის მხრიდან არსებობს და ასევე მისი წევრების მხრიდანაც და ეს აშკარად იგრძნობა. შესაბამისად, ასეთი არათანმიმდევრული პოლიტიკური პარტია, რომელსაც ასეთი უპასუხისმგებლო დამოკიდებულება აქვთ ერთმანეთის მიმართ და საკუთარი ამომრჩევლის მიმართ, ცხადია, ეს ყოველთვის ძალიან მძიმედ მთავრდება ხოლმე პარტიისთვის“, – განაცხადა რატი იონათამიშვილმა.