საქართველოს ჯანდაცვის მინისტრის ზურაბ აზარაშვილის განცხადებით, მთავრობის დღევანდელ სხდომაზე რამდენიმე მნიშვნელოვანი გადაწყვეტილება მიიღეს. კერძოდ, როგორც მინისტრი ამბობს, ფარმაცევტული პროდუქტის საქართველოში შემოტანის მიზნით, იმპორტიორებისთვის სავალდებულო ხდება ფარმაცევტული პროდუქტის GMP-ის სტანდარტით წარმოების დამადასტურებელი საბუთის წარდგენა.
„მთავრობის დღევანდელ სხდომაზე რამდენიმე მნიშვნელოვანი გადაწყვეტილება მივიღეთ. პირველი ეხება იმპორტიორებისთვის აუცილებელი წესით GMP-ის სერტიფიკატის მოთხოვნას. როგორც გახსოვთ, პირველი იანვრიდან ძალაში შევიდა ადგილობრივი მწარმოებლებისთვის მიმდინარე განმავლობაში ამ სერტიფიკატზე გადასვლის აუცილებლობა. იმპორტიორებს ვთხოვთ GMP-ის სერტიფიკატს“, – განაცხადა ზურაბ აზარაშვილმა.
მისივე თქმით, წამლის ხარისხის კონტროლის მიზნით მიმდინარე წელს საქართველოში წამლის ლაბორატორია შეიქმნება.
„უფრო კარგად და ხარისხიანად რომ ვაკონტროლოთ როგორც იმპორტირებული, ისე ადგილზე წარმოებული წამლის ხარისხი, ჩვენ მიმდინარე წელს საქართველოში შევქმნით წამლის ლაბორატორიას. ამისთვის ბიუჯეტიდან ექვს მილიონამდე თანხა უკვე გამოყოფილია და პროცესი დაწყებული გვაქვს, რათა უმოკლეს ვადაში მოვაწყოთ“, – განაცხადა აზარაშვილმა.