ორბელიანების სასახლეში საქართველოს პრეზიდენტი სალომე ზურაბიშვილი პოლიტიკური და სხვდასხვა ორგანზაციების წარმომადგენელ ქალებს ხვდება. შეხვედრიდან უკვე გამოვიდა „ერთიანი საქართველოს“ ლიდერი ნინო ბურჯანაძე.
როგორც ბურჯანაძემ ჟურნალისტებს განუცხადა, შეხვედრის დროზე ადრე დატოვება მისი მხრიდან რაიმე ტიპის დემარშს არ უკავშირდება. მისივე განმარტებით, ფიქრობს, რომ ამ ფორმატში მისი ადგილი არ არის, რადგან შეხვედრაზე უფრო მეტად რაკურსი გადავიდა წარსულის შეფასებაზე.
„პირველ რიგში, მინდა, გთხოვოთ ყველას, შეხვედრის დროზე ადრე დატოვება არც ერთ შემთხვევაში არ მინდა რაიმე ტიპის დემარშად ჩაითვალოს. ეს არ არის ნამდვილად ჩემი მხრიდან დემარში. უბრალოდ მგონია, რომ ამ ფორმატში, ამ შემთხვევაში ჩემი ადგილი ნამდვილად არ არის, იქედან გამომდინარე, რომ რაკურსი გადავიდა უფრო წარსულის შეფასებაზე“, – განაცხადა ნინო ბურჯანაძემ.
მან ასევე აღნიშნა, რომ მოლოდინი ჰქონდა, სალომე ზურაბიშვილი უკვე ჩატარებული კონსულტაციების თაობაზე შეხვედრაზე მისულებს საქმის კურსში ჩააყენებდა.
ნინჯო ბურჯანჯაძის გაჯნცხადებით, მისთვის ნებისმიერი ფორმატი მნიშვნელოვანია მხოლოდ იმ შემთხვევაში, თუ ის პოლიტიკური კრიზისიდან გამოსვლის შანსს იძლევა.
„მქონდა მოლოდინი იმასთან დაკავშირებით, რომ ქალბატონი სალომე ჩაგვაყენებდა საქმის კურსში უკვე ჩატარებული კონსულტაციების თაობაზე და სულ მცირე თავის მოსაზრებას გვეტყოდა იმასთან დაკავშირებით, კრიზისიდან გამოსვლის გზას როგორ ხედავს. წარსულის შეფასება არის ძალიან მნიშვნელოვანი, მაგრამ ეს არ არის ახლა აქტუალური.
მინდა, გითხრათ რომ მე არა ვარ ისტორიკოსი, რომელიც დაიწყებს წარსულის კომპეტენტურ შეფასებას. მე ვარ პოლიტიკური პარტიის ლიდერი, მოქმედი პოლიტიკოსი და ბუნებრივია, ნებისმიერ შეფასებასთან დაკავშირებით მექნება ჩემი პოლიტიკური ხედვა. ეს არ ნიშნავს, რომ თუ ეს მოქმედი ჯგუფები, რომლებიც ახლა უნდა შეიქმნას, შეძლებენ ქვეყნისათვის მნიშვნელოვანი დეკლარაციის მიღებას და მე მათ ამაში წარმატებას ვუსურვებ, ამაში არ ჩავერთვები. მზად ვარ, თუ იქნება ისეთი ტიპის დეკლარაცია, მოსაზრება ან რეკომენდაცია, რომელსაც დავეთანხმები. უბრალოდ ამ ფორმატში ვფიქრობ, ჩემი ჩართულობა შედეგის მომტანი ვერ იქნება,
ქალბატონ სალომესთან პირისპირ საუბარი არ ყოფილა, მან შესავალი სიტყვით მოგვმართა.კიდევ ვიმეორებ, ველოდი, რომ იქნებოდა რაღაც პოლიტიკური ინფორმაცია იმასთან დაკავშირებით, სადამდე მივიდა ქალბატონი სალომე ამ კონსულტაციების დროს. როგორც ჩანს, უბრალოდ დღეს სხვა ფორმატი იყო ჩაფიქრებული. ჩემთვის ნებისმიერი ფორმატი მნიშვნელოვანი და აქტუალურია მხოლოდ იმ შემთხვევაში თუ ეს ფორმატი გვაძლევს დღეს პოლიტიკური კრიზისიდან გამოსვლის შანსს და გვაჩვენებს პოლიტიკური კრიზისიდან გამოსვლის გეგმებს“, – განაცხადა ბურჯანაძემ.