“უგულავა, ბოკერია და მისთანანი დღეს რომ ცოცხლები არიან, ამას ბიძინა ივანიშვილს უნდა უმადლოდნენ,” – ეს განცხადება ქართველმა ოლიმპიურმა სპორტსმენმა, ლუკა კურტანიძე “ჯორჯიან თაიმსის” ეთერში სტუმრობისას გააკეთა.
კურტანიძის განმარტებით, საქართველოს მესამე პრეზიდენტმა და მისმა გარემოცვამ რაც არ უნდა სცადონ, ისინი “ქართული ოცნების” დამფუძნებლის რეიტინგს ზიანს მაინც ვერ მიაყენებენ.
კურტანიძის თქმით, ბიძინა ივანიშვილს ავტორიტეტი ყოველთვის ჰქონდა და მას დღესაც წარმატებით ინარჩუნებს.
“ბიძინა ივანიშვილს იმხელა ავტორიტეტი აქვს, რომ რაც არ უნდა სცადოს მიხეილ სააკაშვილმა, გიგი უგულავამ, გიგა ბოკერიამ და სხვებმა, რომ მისი რეიტინგი როგორმე დაწიეონ, ამას ვერ შეძლებენ, რადგან ეს ადამიანები ბიძინა ივანიშვილის იმის ნახევარს ვერ გააკეთებენ, რაც მან ამ ქვეყნისთვის შეძლო.
ამიტომ, უნდათ თუ არ უნდათ ისინი ამას უნდა შეეგუონ. ზუსტად ბიძინა ივანიშვილის დამსახურებაა, რომ დღეს ეს ადამიანები ფიზიკურად არსებობენ. ამ ადამიანებს მათ მიერ განადგურებული, ღირსება შელახული და ათასობით გამწარებული ოჯახები გამოუტანდნენ განაჩენს, მაგრამ სწორედ ივანიშვილის ავტორიტეტის დამსახურებაა, რომ ასე არ მოხდა,” – განაცხადა ლუკა კურტანიძემ.