პარტია „ევროპელი სოციალისტების“ წარმომადგენელმა, დეპუტატმა დავით ზილფიმიანმა, უკრაინაში შექმნილ ვითარებასთან დაკავშირებით “ევროპელი სოციალისტების” განცხადება გააკეთა.
„ჩვენ სოლიდარულნი ვართ და გამოვხატავთ სრულ მხარდაჭერას უკრაინელი ხალხის მიმართ. ეს ომი, რომელიც რუსეთსა და უკრაინას შორის მიმდინარეობს, უკრაინელი ხალხისთვის არის წმინდათა წმინდა სამამულო ომი, რომელშიც საკუთარი სამშობლოსა და ხალხის სიცოცხლის დასაცავად იბრძვიან.
უკრაინისთვის ამ ძნელბედობის ჟამს, მსოფლიოს დემოკრატიული საზოგადოებისა და ქვეყნების მიერ, უკრაინის მხარდამჭერ და ხელშემწყობ მთელ რიგ ქმედებებთან ერთად, როგორც ეს არაერთხელ გაგვიჟღერებია, უპირველესი და ერთ-ერთი ყველაზე მნიშვნელოვანი, ამ სიტუაციაში იქნება მებრძოლი უკრაინისა და საქართველოს დაჩქარებული პროცედურებით ევროკავშირის წევრად მიღება, რისთვისაც მოვუწოდებთ ყველა ჩვენს ევროპელ პარტნიორს იმისკენ, რაც სამომავლოდ ისედაც იგეგმებოდა.
მოვუწოდებთ, როგორც ჩვენი ქვეყნის ხელისუფლებას, ასევე, სრულიად ევროპულ საზოგადოებას ამ მიზნის განსახორციელებლად საჭირო უსწრაფესი ქმედითი ნაბიჯების გადადგმისაკენ, რაც უკრაინისთვის ამ სიტუაციაში სოლიდარობისა და პარტნიორობის ყველაზე დიდი გამომჟღავნება იქნება“, – აღნიშნულია პარტია „ევროპელი სოციალისტების“ განცხადებაში.