საქართველოს მორაგბეთა ეროვნული ნაკრები დღეს შოტლანდიას დაუპირისპირდება. საქართველოს ნაკრები ნოემბრის ტესტმატჩების ბოლო შეხვედრას შოტლანდიაში, ქალაქ კილმარნოკში გამართავს. მანამდე “ბორჯღალოსნებმა” ნოემბრის ტესტმატჩებზე იაპონიასა და სამოას თბილისში უმასპინძლეს. ქართველი მორაგბეები იაპონიასთან ანგარიშით 22:28 დამარცხდნენ, სამოას კი 20:16 სძლიეს.
სამოასთან მოგებული მატჩის შემდეგ საქართველოს ნაკრების მთავარმა მწვრთნელმა მილტონ ჰეიგმა სასტარტო შემადგენლობაში მხოლოდ ერთი ცვლილება განახორციელა. წინა მატჩში თავის ტრავმა მიიღო გიორგი კოშაძემ და მის ნაცვლად სასტარტოში გიორგი აფციაური დააყენა.
როგორც საქართველოს ნაკრების მთავარმა მწვრთნელმა აღნიშნა, შოტლანდიასთან მატჩი საქართველოსთვის შანსია, რომ მსოფლიო სარაგბო თანამეგობრობას თავი შეახსენოს და შექმნას საფუძველი ისეთი დისკუსიებისთვის, როგორიცაა ექვსი ერის გაფართოება.
“ეს მატჩი ჩვენთვის უმნიშვნელოვანესია, რადგან ექვსი ერის გუნდებთან – ამ შემთხვევაში შოტლანდიასთან თამაშის შესაძლებლობა დაახლოებით ორ წელიწადში ერთხელ გვეძლევა. ესაა შანსი შევახსენოთ თავი მსოფლიო სარაგბო თანამეგობრობას, ღირსეულად წარმოვაჩინოთ საქართველო საერთაშორისო ასპარეზზე და ამავდროულად, შევქმნათ საფუძველი ისეთი დისკუსიებისთვის, როგორიცაა ექვსი ერის გაფართოება. ჩვენი გამორჩეული თამაშით, შეგვიძლია ექვსი ერის არსებული მონაწილეები ტურნირში საქართველოს ჩართვაზე სერიოზულად დავაფიქროთ. ამას თავი რომ დავანებოთ, დღეისათვის შოტლანდიის ნაკრები მსოფლიო რეიტინგში მე-7 ადგილს იკავებს, რაც ძალიან კარგი შედეგია. მეტოქე ძლიერია და მასთან თამაში ჩვენთვის დამკვიდრების შესანიშნავი საშუალებაა. აუცილებელია გაგრძელება მივცეთ იმას, რაც წინა წლებში და განსაკუთრებით განვლილ მსოფლიო თასზე გაკეთდა”, – აღნიშნავს მილტონ ჰეიგი, რომლის კომენტარიც რაგბის კავშირის ვებ-გვერდზე გამოქვეყნდა.
“ბორჯღალოსნებმა” შოტლანდიის ეროვნული ნაკრების წინააღმდეგ მხოლოდ ერთხელ, 2011 წლის მსოფლიო თასზე ითამაშეს და 6:15 დამარცხდნენ.შოტლანდიელები ამჟამად 80,57 ქულით მსოფლიოს რეიტინგში მე-7 ადგილს იკავებენ.
შეხვედრა თბილისის დროით 18:20 საათზე დაიწყება და მის პირდაპირ ტელეტრანსლაციას “პირველი არხი” განახორციელებს.