საერთაშორისო სარეიტინგო სააგენტო “მუდისის” შეფასებით, საქართველოს მთავრობის გადაწყვეტილება 2015 წლამდე დოლარში გამოტანილი იპოთეკური კრედიტების ლარში სუბსიდირების შესახებ ქართული ბანკებისთვის პოზიტიურია, რადგან საკრედიტო დანაკარგებს ამცირებს.
სააგენტო აღნიშნავს, რომ მთავრობის გეგმა ბანკებისთვის არანაირ დანახარჯებს არ ითვალისწინებს, რადგან სახელმწიფო ბიუჯეტი 20-თეთრიან სხვაობას დაფარავს.
“მუდისის” შეფასებით, პროგრამა ბანკების საკრედიტო პორტფელების 5%-ს შეეხება. პროგრამა ფიზიკური პირებისთვის უძრავი ქონების უზრუნველყოფით გაცემული სესხების (100 ათას ლარამდე) ლარში გადაყვანას ითვალისწინებს.
სესხის კონვერტაციის დროს აღებული იქნება ოფიციალური გაცვლით კურსზე 20 თეთრით ნაკლები. მაგალითისთვის, თუ გაცვლითი კურსი 2,50 ლარია, კონვერტაციის კურსი 2,30 ლარი იქნება. კონვერტაციის პროგრამა 2017 წლის 1 იანვარს იწყება და 28 თებერვალს დასრულდება და საქართველოს ეროვნული ბანკის ადმინისტრირებით წარიმართება.