ნოდარ ხადურმა ის სტუდენტები დააჯილდოვა, რომლებმაც საქართველოს დამოუკიდებლობის აღდგენის 25 წლისთავისადმი მიძღვნილი ღონისძიებების ფარგლებში, მონაწილეობა მიიღეს ფინანსთა სამინისტროს გამოცხადებულ კონკურსში თემაზე: „საქართველოს პირველ რესპუბლიკაში განხორციელებული ეკონომიკური რეფორმები და პოლიტიკა”.
დაჯილდოების ცერემონია თბილისის გაფორმების ეკონომიკურ ზონაში გაიმართა, სადაც ფინანსთა მინისტრმა სტუდენტებისთვის საქართველოს პირველ რესპუბლიკაში განხორციელებული ეკონომიკური რეფორმებისა და პოლიტიკის შესახებ საჯარო ლექცია წაიკითხა.
ფინანსთა სამინისტროს აკადემიის მხარდაჭერით, საუკეთესო სტატიის შესარჩევად კონკურსში მონაწილეობა მიიღეს სხვადასხვა უმაღლესი სასწავლებლის სტუდენტებმა.
საკონკურსო კომისიას ხელმძღვანელობდა ფინანსთა მინისტრი და მის შემადგენლობაში შედიოდნენ მინისტრის მოადგილეები, დეპარტამენტების ხელმძღვანელები, ფინანსთა სამინისტროს აკადემიის დირექტორი და ივ. ჯავახიშვილის სახელობის თბილისის სახელმწიფო უნივერსიტეტიდან მოწვეული პროფესორები.
ფინანსთა სამინისტროს გადაწყვეტილებით, კონკურსში გამარჯვებული საუკეთესო სტატიები გამოიცემა კრებულის სახით და საჩუქრად გადაეცემა სტუდენტებსა და ბიბლიოთეკებს. ერთ-ერთი გამარჯვებული სტუდენტი კი, სამინისტროში პრაქტიკას გაივლის.
თბილისის გაფორმების ეკონომიკურ ზონაში სტუმრობისას, სტუდენტები გაეცნენ გაფორმების პროცედურებსა და სერვისებს.
„ფინანსთა სამინისტრომ გამოაცხადა კონკურსი სტუდენტებისათვის, „პირველი რესპუბლიკის ეკონომიკური რეფორმების თაობაზე“. სამწუხაროდ, ეს თემა კარგად არ არის შესწავლილი, ამიტომ ჩვენ გადავწყვიტეთ ხელი შეგვეწყო იმ ეკონომიკური რეფორმების გააზრებისათვის, რომელიც იმ პერიოდში ჩატარდა, როდესაც საქართველო დამოუკიდებელი იყო. ჩვენ გამოვავლინეთ გამარჯვებული სტუდენტები, მათ შორის ერთ-ერთი მათგანი, რომელიც პრაქტიკას გაივლის ფინანსთა სამინისტროში. თუმცა, ყველა ნამდვილად გამარჯვებულია, ვინაიდან მათ მიეცათ შესაძლებლობა, საკუთარი ნაშრომი გაეზიარებინათ, ჩვენ გამოვცემთ კრებულს საუკეთესო სტატიების“, – განაცხადა ფინანსთა მინისტრმა ჟურნალისტებთან საუბრისას.